Astanadaǵy fýtbol úıi qashan ashylady
ASTANA. QazAqparat - Búgin Qazaqstan fýtbol federatsııasynyń XVII konferentsııasynda Astanadaǵy fýtbol úıiniń qurylysy jaıynda aıtyldy. Atalǵan nysanǵa ÝEFA-nyń qyrýar qarjysy quıyldy, dep xabarlaıdy QazAqparat tilshisi.
ÝEFA-nyń ulttyq qaýymdastyqtar departamentiniń dırektory Zoran Lakovıchtiń aıtýynsha, ótken aptada uıym músheleri Astanadaǵy kópbeıindi fýtbol keshenin aıaqtaýǵa 1,1 mln eýrony bólip berýdi qoldady.
«Jalpy, osy ýaqytqa deıin biz atalǵan jobaǵa 9 mln eýrodan astam qarjy quıdyq. Saltanatty ashylý rásimine bizdiń prezıdentimiz Aleksandr Cheferın myrza qatysady degen jospar bar», - dedi Z.Lakovıch.
Qazaqstan fýtbol federatsııasynyń Bas xatshysy Azamat Aıtxojınnyń sózine qaraǵanda, Astanadaǵy fýtbol úıi aǵymdaǵy jylda tolyǵymen paıdalanýǵa beriledi. Atalǵan nysan ÝEFA-nyń «Het-trık» baǵdarlamasy aıasynda salynyp otyr. Aýdany - 3,5 gektar. Ol jerde federatsııanyń keńsesi, fan-shoptar men fıtnes-ortalyq bolady. Budan bólek, jabyq fýtbol alańy bar. Búgingi konferentsııaǵa qatysýshylar Astanadaǵy fýtbol úıiniń alańyna baryp qaıtty. Sol jerdegi manejde alǵashqy matchty da ótkizdi.
Aıta keteıik, búgingi konferentsııada QFF-nyń «Alǵa, fýtbol! Alǵa, Qazaqstan!» atty jańa strategııasy tanystyryldy. Atalǵan qujatta batyl bir maqsat bar. Ol - fýtboldyń qazaqstandyq stılin qalyptastyrý. Sonyń arqasynda Qazaqstannyń fýtboly barsha álemge tanylady degen jospar bar. Sondaı-aq, jańa strategııada áıelder klýbtaryn arttyrý mindeti belgilenip otyr. Aldaǵy ýaqytta Qazaqstan fýtbol federatsııasy ortanqol legıonerlerden qutylmaqshy. Búgingi konferentsııada úsh mınıstr Qazaqstan fýtbol federatsııasyna múshe bolyp saılandy. Al uıym basshysy Ádilbek Jaqsybekov fýtboldaǵy jemqorlyqpen qalaısha kúresetini týraly aıtyp berdi. 
