Astanadaǵy forýmda memqyzmetti jetildirý boıynsha usynymdar ázirlendi

ASTANA. QazAqparat - Qazaqstan Respýblıkasynyń Memlekettik hatshysy Gúlshara Ábdiqalyqova «Qazaqstannyń saıası memlekettik qyzmeti: qalyptasý jáne damý kezeńderi» atty forýmǵa qatysty.

Bul týraly Aqordanyń baspasóz qyzmetinen habarlady.

Qazaqstan Táýelsizdiginiń 25 jyldyǵyna jáne Ulttyq joǵary memlekettik basqarý mektebi (UJMBM) alǵashqy túlekteriniń 20 jyldyǵyna arnalǵan forýmdy uıymdastyrýǵa UJMBM túlekteri qaýymdastyǵy, Memlekettik qyzmettiń óńirlik haby, Frantsııanyń Qazaqstan Respýblıkasyndaǵy elshiligi, Astana qalasy ákimdigi jáne ózge de uıymdar atsalysty.

Іs-sharanyń maqsaty - Qazaqstan qoǵamynyń birligin qamtamasyz etý jáne táýelsiz memlekettiń damýynyń strategııalyq maqsattaryna qol jetkizý úshin eldiń saıası memlekettik qyzmetin jetildirýdiń jahandyq trendteri men joldaryn talqylaý.

Forým jumysyna memlekettik organdardyń jáne ulttyq kompanııalardyń basshylary, UJMBM túlekteri, sondaı-aq Nazarbaev ýnıversıtetiniń jáne Qazaqstan Respýblıkasy Prezıdentiniń janyndaǵy Memlekettik basqarý akademııasynyń oqytýshylary men magıstranttary qatysty.

Forýmnyń ashylýynda sóz sóılegen G.Ábdiqalyqova Memleket basshysy usynǵan Bes ınstıtýtsıonaldyq reformanyń birinshi baǵyty kásibı memlekettik apparat qurý bolyp sanalatynyn atap ótti. Qazaqstannyń óz táýelsizdiginiń 25 jylynda qol jetkizgen jetistikteriniń biri - memlekettik qyzmetshilerdi daıarlaý júıesin qalyptastyrýy. Saıası kadrlardy daıarlaýdyń ulttyq modelin qalyptastyrý isine jańa formatsııanyń 82 basqarýshysyn daıarlaǵan UJMBM mańyzdy úles qosty.

Sondaı-aq, forýmda Memlekettik qyzmet salasyndaǵy óńirlik habtyń basqarýshy komıtetiniń tóraǵasy Á.Baımenov, Frantsııanyń Qazaqstandaǵy Tótenshe jáne ókiletti elshisi F.Eten, «Jasyl akademııa» ǵylymı-bilim berý ortalyǵynyń dırektory B.Esekına sóz sóıledi.

Forým qorytyndysy boıynsha Qazaqstanda saıası memlekettik qyzmetti jetildirý jáne jańa formatsııa basqarýshylaryn daıarlaý jónindegi tájirıbelik usynymdar ázirlendi.