Astanadaǵy Fight Nights-ta bas tóreshini urǵan sportshynyń ústinen is qozǵaldy
ASTANA. QazAqparat - Reseı sportshysy Gadjımurad Hıramagomedov Fight Nights Global uıymynyń músheliginen shyǵarylady. Astanada ótken aralas jekpe-jekter chempıonatynda ol bas tóreshini urǵan, dep habarlaıdy QazAqparat tilshisi TASS agenttigine silteme jasap.
Chempıonatta Hıramagomedov qazaqstandyq sportshy Georgıı Kıchıgınge qarsy shyqqan bolatyn. Jekpe-jektiń qorytyndysy boıynsha Kıchıgın Fight Nights chempıony atandy. Alaıda qazaqstandyq sportshy óz qarsylasyn aıqyn basymdyqpen jeńe almady. Oǵan qosa, óz upaılaryn Hıramagomedovke bergen tóreshiler de tabyldy. Al jekpe-jekten keıin reseılik sportshy men Reseı MMA odaǵynyń vıtse-prezıdenti Radmır Gabdýllınniń arasynda janjal týyndady. Sol kezde bas tóreshi qatty jaraqat aldy. Hıramagomedov ony qazaqstandyq boksshyǵa bolysty dep aıyptaǵan.
"Qamal" klýbynyń basshysy Magomed Kadıevtiń aıtýynsha, Astanada Hıramagomedovtyń ústinen ákimshilik is qozǵaldy. Gabdýllın bolsa, Máskeýge ushyp kelgen boıda shuǵyl túrde aýrýxanaǵa jatqyzyldy. Onyń jaq súıegi eki jerden synyp, mıy shaıqalǵan.
"Biz janjaldyń mán-jaıyn bilmeımiz. Degenmen, ondaı áreket shekten shyǵyp otyr. Biz ol sportshymen endi jumys istemeımiz", - deıdi Kadıev.
Aıta keteıik, Hıramagomedov - áýesqoılar arasynda MMA-dan eki dúrkin álem chempıony. Budan bólek, Reseıdiń eki dúrkin chempıony ári Sýperkýboktyń ıegeri. Osy ýaqytqa deıin reseılik sportshy bes ret jeńiske jetip, eki ret utylǵan.
