Astanadaǵy EXPO alańynda Jańa Jyl Fest jármeńkesi ótedi

ASTANA. QazAqparat - 17-19 jeltoqsan aralyǵynda Astana qalasyndaǵy EXPO halyqaralyq kórme ortalyǵynyń alańynda «Jańa jyl Fest» jańajyldyq jármeńkesi ótedi. Іs-sharany Astana qalasy ákimdiginiń qoldaýymen «QazExpoCongress» ulttyq kompanııasy» aktsıonerlik qoǵamy uıymdastyrady, dep habarlaıdy QazAqparat.

«Jańa jyl Fest» jármeńkesi – mıkrobıznes, shaǵyn jáne orta bıznes ókilderin (onyń ishinde otandyq óndirýshiler), sondaı-aq qoldan jasalǵan buıymdardy usynatyn Astana qalasy men el óńirleri (Kókshetaý, Qostanaı, Óskemen, Qyzylorda, Shymkent, Almaty qalalary, Aqmola men Mańǵystaý oblystary jáne t.b.) qolónershileriniń basyn qosyp, qoldaý kórsetetin áleýmettik joba. Іs-sharaǵa 200-ge jýyq qatysýshy atsalysady.

Jármeńkede ártúrli is-sharalar ótkiziledi: jańajyldyq saýda, Aıaz ata, Aqshaqarmen erteńgilikter, qýyrshaqtarmen ınteraktıvti is-sharalar, kıizden merekelik shulyq jasaý, slaım, bilezikter, shyrsha áshekeıleri, kıizden jasalǵan qabyrǵaǵa iletin shamdar, ashyqhattarǵa arnalǵan applıkatsııalar jasaý boıynsha balalarǵa arnalǵan sheberlik saǵattary, sonymen qatar kelýshilerge jańajyldyq fotoaımaqtar, mýltfılmder jáne t.b. usynylady.

Jármeńke barysynda kelýshiler Jańa jylǵa arnalǵan syılyqtar men kádesyılardy tańdap alyp qana qoımaı, mereke kúnderi qarsańyndaǵy demalystaryn qyzyqty ótkize alady.

Sonymen qatar jármeńke aıasynda jastarǵa arnalǵan mádenıet jáne sport festıvali – Qogam Urban Festival ótedi. Q-FEST 12 baǵyt boıynsha uıymdastyrylady: Hip-Hop, Breaking, Freestyle, skeıtbordıng, fýtbol frıstaıly, parkýr, agressıvti rolıkter jáne t.b.