Astanadaǵy «Eýropalyq» turǵyn úı kesheninen shyqqan órt sóndirildi

NUR-SULTAN. QazAqparat – Elordada «Eýropalyq» turǵyn úı kesheninen shyqqan órt sóndirildi, dep habarlaıdy QazAqparat tilshisi.

Buǵan deıin 18 qabatty «Eýropalyq» turǵyn úı kesheniniń №1 kireberisindegi 10 men 14 qabat aralyǵynda elektr kabelderi tartylǵan shahtanyń janyp jatqanyn jazǵan edik. Órt bir saǵatqa jýyq ýaqyttan keıin sóndirildi.

«10 men 18 qabat aralyǵynda elektr kabelderi tartylǵan shahtanyń 25 metri janǵan. Saǵat 16.14-te órttiń beti qaıtarylyp, saǵat 16.17-de tolyǵymen sóndirildi. Elordanyń órt sóndirý qyzmetiniń mamandary 6 adamdy, onyń ishinde 5 balany qaýipsiz jerge shyǵardy. Órttiń shyǵý sebebi anyqtalyp jatyr», - dedi Nur-Sultan qalalyq Tótenshe jaǵdaılar departamentinen.

Aıta keteıik, órtti sóndirýge Nur-Sultan qalalyq Tótenshe jaǵdaılar departamentiniń jeke quramynyń 22 mamany men 6 tehnıkasy jumyldyrylǵan.