Astanadaǵy eski úılerdi syrý jobasy oıdaǵydaı iske assa, bul tájirıbe elimizdiń basqa óńirlerinde de qoldanylady - Astana ákimi
ASTANA. 21 qarasha. QazAqparat - Eger apatty jaǵdaıdaǵy jáne eski ǵımarattardy syrý pılottyq jobasy oıdaǵydaı iske asyrylsa, ol joba elimizdiń óńirlerinde de qoldanylatyn bolady. Mundaı oıdy búgin elordalyq ákimdikte kásipkerlikti damytý boıynsha ótken jınalysta qala ákimi Imanǵalı Tasmaǵambetov aıtty.
«Barlyq naryqtyq ekonomıkaly elderdegi sııaqty jalǵa beriletin turǵyn úı bizde de basty nazarda bolýy tıis. Máselen, Germanııada jalǵa beriletin turǵyn úı barlyq turǵyn úı qorynyń 60 paıyzyn quraıdy. Ol elde jalǵa berý saıasatynyń barlyq máselelerine jaýap beretin zań qabyldanǵan. Sol eldiń azamattary zańmen qorǵalǵandyqtan, erteń bireý úıinen qýyp shyǵady eken dep alańdamaıdy. Sondyqtan jınaǵan qarajatyn úı satyp alýǵa emes, densaýlyǵyn saqtaýǵa, bilim alýǵa jáne óz bıznesin ashýǵa jumsaıdy», - dedi ákim.
Onyń sózderinshe, ákimdikte birneshe kún buryn eski jáne apatty jaǵdaıdaǵy úılerdi buzýǵa kirisken. «Memleket basshysynyń tapsyrmasy boıynsha, biz shetel tájirıbesin, sonyń ishinde Ankaradaǵy túrikterdiń tájirıbesin zerttedik. Olar osy baǵdarlama arqyly qaladaǵy apatty jáne eski úılerdiń barlyǵyn syrǵan. Ony iske asyrý op-ońaı. Biz memleketten 40 mlrd. teńgeni nesıege aldyq. Osy qarajatqa turǵyn úı salyp, salynǵan páterlerdiń 70 paıyzyn naryq baǵasymen satamyz da, qalǵan 30 paıyzyn syrylǵan apatty jáne eski úılerdiń ıelerine beremiz», - dep atap ótti I. Tasmaǵambetov.
Onyń aıtýynsha, naryq baǵasymen satylǵan 70% páterdiń árbir sharshy metrinen shamamen 500 AQSh dollaryndaı paıda túsedi. Ol qarajat odan ári qurylys jumystaryn júrgizýge jáne memleket nesıesin tóleýge jumsalady.
«Munyń paıdasy, bizdiń naryq kestesi boıynsha jumys jasaı bastaýymyzda. Jáne bul Astanadaǵy qurylystyń toqtap qalýyna jol bermeıtin keste. Osylaısha, biz qarjylyq qor qura otyryp, qalamyzda jańa nysandar salý arqyly, elordanyń aktıvterin jańartyp otyramyz», - dep túsindirdi ákim.
Sondaı-aq, ol bul pılottyq jobanyń Astanada qalaı iske asyrylýyna baılanysty, bolashaqta elimizdiń basqa óńirlerinde qoldanylýy aıqyndalatynyn aıtty.
«Osy eki mysaldy baılanystyra kele aıtarym, jalǵa beriletin turǵyn úı mehanızmin qanshalyqty durys qoldana alsaq, ekonomıkamyzdyń osy segmenti de sonshalyqty damymaq. Sondyqtan, bul máseleni jan-jaqty oılastyrý qajet», - dep atap ótti qala basshysy.
