Astanadaǵy Esil, Aqbulaq, Sarybulaq ózenderiniń sýy sanıtarııa talaptaryna saı emes - komıtet

NUR-SULTAN. QazAqparat - Nur-Sultan qalasynyń sý aıdyndarynda sýdyń sapasy men qaýipsizdigi tekserildi, dep habarlaıdy QazAqparat.

Sanıtarlyq-epıdemıologııalyq baqylaý komıtetiniń málimetinshe, jazdyń birinshi kúninde shomylý maýsymy resmı túrde ashylady jáne ol qyrkúıek aıyna deıin jalǵasady.

Degenmen sýǵa túspes buryn ol jer shomylýǵa qaýipsiz ekenin anyqtap alǵan durys.

Jaǵajaıdyń túbin aldyn ala tekserip, sondaı-aq tótenshe jaǵdaıda kómekke keletin adam tabylatynyna kóz jetkizip baryp shomylý kerek. Otbasynyń qaýipsizdigi úshin arnaıy shomylý oryndarynda demalǵan durys.

«Nur-Sultan qalasynyń sanıtarııalyq-epıdemıologııalyq baqylaý departamenti jazǵy kezeńde qala sheginde ornalasqan, onyń ishinde shomylýǵa jáne demalýǵa arnalǵan oryn retinde paıdalanylatyn ashyq sý qoımalary sýynyń sapasyna monıtorıng júrgizdi. Zerthanalyq zertteý nátıjesi boıynsha Esil, Aqbulaq, Sarybulaq ózenderinen jáne Nura-Esil kanalynan alynǵan búkil sý synamasynda sanıtarııalyq-hımııalyq kórsetkish boıynsha sáıkessizdikter anyqtaldy. Atap aıtqanda túsi boıynsha - 2,71 ese, temir mólsheri boıynsha - 2,3 ese jáne ottegin hımııalyq tutyný boıynsha - 1,87 ese normadan asyp ketti» dep málim etti komıtetten.

Shomylýdan keıin jaǵymsyz saldardyń aldyn alý úshin qarapaıym jeke gıgıena erejelerin saqtaý kerek, ıaǵnı múmkindiginshe tezirek gıgıenalyq dýsh qabyldap, eshqandaı jaǵdaıda sý qoımalarynan sý ishpeý kerek.

Belgilenbegen jerde shomylý ózińizdiń jáne jaqyndaryńyzdyń densaýlyǵyna qaýip tóndiredi.

«Belgili bir jerde shomylyp, demalý úshin sý aıdyndaryndaǵy sýdyń sapasyn óndiristik zerthanalyq baqylaýdy qamtamasyz etý boıynsha qajetti jumystar júrgizilgen aımaqtardy ǵana tańdańyz. Bul sizge densaýlyǵyńyz úshin esh ýaıymdamaı, tolyqqandy, sapaly demalýǵa kepildik beredi. Sondaı-aq, sý qoımasynda shomylýǵa tyıym salatyn arnaıy aqparattyq belgilerge jiti nazar aýdarý qajet» dep eskerted vedomstvo.