Astanadaǵy eń jaıdary júzdi jan izdestirilip jatyr
ASTANA. QazAqparat - Joǵary oqý oryndarynyń arasynda «Astana jalyny-2017» jastardyń shyǵarmashylyq festıvalin ótkizý barysynda elorda ákimi Áset Isekeshev «Smile Astana - Aqjarqyn Astana - Astana - gorod dobryh ı ýlybchıvyh lıýdeı» jobasyn ótkizýdi usyndy, dep habarlaıdy qalalyq ákimdiktiń baspasóz qyzmeti.
«Smile Astana jobasyn qolǵa alyp, Astana turǵyndary úshin erejeler jınaǵyn qurýdy usynamyn. Bir-birimizge, aınaladaǵylarǵa kúle qarap, qarııalarǵa kómekteseıik, kezekte turǵanda qart adamdardy, júkti áıelderdi alǵa ótkizip, sypaıy bolaıyq», - dep úndedi qala basshysy shyǵarmashylyq festıval jeńimpazdaryn marapattaý rásiminde.
Ákimniń bul oıyn qalanyń jastar birlestikteri men uıymdary qoldap, Smile Astana jobasyn iske asyrýǵa tujyrymdamalyq negizde kiristi. Nátıjesinde elordanyń baqytty turǵynynyń beınesin qalyptastyrýǵa baǵyttalǵan jańa mádenı trend paıda boldy. Joba sheńberinde túrli aktsııalar, jastardyń fleshmobtary jáne kóńildi baıqaýlar qarastyrylǵar. Sondaı-aq, qalada eń jarqyn júzdi adam/ádemi kúlki baıqaýy jarııalanady.
Buǵan qosa, qala kóshelerinde, qoǵamdyq oryndarda jáne qalalyq kólikterde jastar uıymdarynyń ókilderi elorda turǵyndary men qonaqtaryna smaıldar taratady, kóshede alyp qýyrshaqtar óner kórsetedi. Al áleýmettik jelilerde #smileastana, #aqjarqynastana heshtegterimen posttar qurylady.
Sonymen birge, qala kóshelerinde qala turǵyndarynyń kóńilin kóteretin smaıldary bar tızerler men bılbordtar paıda bolady.
Jobanyń negizine álemdik tájirıbeniń trendteri negizge alynyp, EKSPO halyqaralyq kórmesi qarsańynda elorda turǵyndaryn jaqsy kóńil kúıge keltirý maqsaty qoıylyp otyr.
2016 jyly álemdegi eń baqytty memleket ataǵyn Danııa (World Happiness Report 2016) eli ıelengen bolatyn. Bul reıtıngte Qazaqstan 54-shi oryn alady (Reseı - 56-shy).
Astana mańyzdy shara - EKSPO-2017 kórmesin qabyldaýǵa daıyndalýda. Elordaǵa shetelden myńdaǵan qonaq keledi, olardyń ishinde áleýetti týrıster, ınvestorlar jáne elimizdiń shet memleketterdegi bolashaq brend-ambassadorlary bolady. Sol sebepti dál qazir elorda turǵynynyń rýhy men beınesin qalyptastyrý úshin tıimdi ýaqyt jáne buǵan árbir elordalyq úles qosa alady.
Álemdik tájirıbe boıynsha, mundaı naýqandar belgili brendterge aınalǵan: The Coca Cola Company - «Happiness starts with a smile» jobasy, Confidence Coalition - «You Make Me Smile» Campaign jobasy, Bucks New University Smile Campaign, Savers Smile Campaign jáne t.b..
