Astanadaǵy eń iri muz qalashyǵy «Han Shatyr» saýda ortalyǵy mańynan ashylady
ASTANA. QazAqparat - Qystyń kelýimen Astana turǵyndary men qonaqtaryna arnap kóptegen qyzyqty sharalar ázirlenýde. Qalyptasqan dástúr boıynsha Astananyń baqtarynda jáne Esil jaǵalaýynda muz aıdyndary quıylyp, muz qalashyqtary salynady. Eń úlken muz qalashyǵy «Han Shatyr» saýda oıyn-saýyq ortalyǵynyń mańynda ornalasatyn bolady, dep habarlaıdy Astana ákimdiginiń baspasóz qyzmeti.
Saýda ortalyǵynyń qasyndaǵy alańda muz músinderine toly qalashyqtan basqa, muz aıdyny, syrǵanaý tóbeshikteri, konkı men shanany jalǵa berý beketteri, shaı iship, jylynatyn oryndar qarastyrylatyn bolady.
Elorda ákimdiginiń aldyndaǵy muz aıdyny da ashyq aspan astyndaǵy qysqy qyzyq túrlerin unatatyndardyń kóńilinen shyǵatyny anyq. Sondaı-aq, bıyl Esil jaǵalaýyndaǵy dástúrli muz aıdynynan bólek, saǵat túrinde bezendirilgen «Kún» sýburqaǵynyń qasynda da konkı tebýge múmkindik bar.
Sonymen qatar, Aqbulaq bulaǵynda, «Jeruıyq» jáne Prezıdent baqtarynda da muz aıdyndaryn quıý josparlanǵan.
«Araı» baǵynda byltyrǵymen salystyrǵanda úlkendeý syrǵanaý tóbeshikteri jasalady. Qaladaǵy eń ádemi muz aıdyndarynyń biri osynda ornalasady. Baqtyń jaryqtandyrylýy ádemi jáne jastardyń qydyrýyna laıyqty. Barlyq muz aıdyndarynda konkıdi jalǵa berý beketteri, tamaqtaný oryndary qarastyrylady, bári ádemi formatta jasalady. Baqtarda konkı tepken yńǵaıly sııaqty, óıtkeni ol jerdegi aǵashtar jelden qorǵaıdy, balalarmen konkı tebýge jaqsy», - deıdi Astana qalasy Kommýnaldyq menshik Qory dırektorynyń orynbasary Ǵanı Hasenov.
Onyń aıtýynsha, barlyq jumystar 20 jeltoqsanǵa deıin aıaqtalady.
