Astanadaǵy elıtaly turǵyn úıler jaryqsyz qalmaıdy
ASTANA. QazAqparat - Elordada elıtaly turǵyn úı keshenderine elektr energııasyn berý qalalyq qyzmetter rezervi esebinen qalpyna keltiriledi.
Bul týraly Feısbýkte Elorda ákimdiginiń janynan Qalalyq sheshimder bıýrosynyń dırektory Dáýir Akremhanov jazdy, dep habarlaıdy QazAqparat.
«Bul másele qalalyq bıliktiń baqylaýynda tur. Qazirgi kezde qosymsha sharalar qabyldanyp, jaqyn arada qalalyq qyzmetter rezervteri esebinen elektr energııasyn berý qalpyna keltiriledi»,-dep jazdy ol.
Eske sala keteıik, 5 aqpanda eki turǵyn úı keshenin («Italıanskıı kvartal» jáne «Gorodskoı romans») elektr energııasymen qamtamasyz etetin 187-úlestirý pýnktine qýat jetkizetin eki joǵary voltty kabel isten shyqqan edi. Apatqa qysqa tuıyqtalý sebep bolǵan. Búginde atalǵan energııa sharýashylyǵy jáne ÚP-187 qalalyq jelilerdiń balansynda joq. Nysandardyń ıesi - «BazısInvestStroı» kompanııasy. Kabel jelisiniń uzyndyǵy 2,5 shaqyrymdy quraıdy
Búlingen kabelderdiń birneshe bóligi qalpyna keltirildi. Biraq, qosý kezinde kabel kerneýdi kótere almady. Mamandardyń aıtýynsha, buǵan vandaldardyń kabeldiń mystan jasalǵan qabatyn sheship alýy sebep boldy. Ol kabeldiń jerge qosylýyn jáne tuıyqtalý jaǵdaıynda onyń qalypty jumysyn qamtamasyz etýi tıis bolǵan.
«Qazir eki shaqyrym kabeldiń mystan jasalǵan qabaty joq. Qala qyzmetteri turǵyn úı keshenderiniń jalpy qajettilikteri úshin jedel túrde eki dızeldik generatorlar ornatty (taǵy bireýin Bazıs iske qosty). Osy oraıda jylý men sýdy jiberýge jáne lıfterdi qosýǵa múmkindik boldy»,-dep jazdy Akremhanov.
