Astanadaǵy elıtaly mektep basshylyǵy oqýshylardyń ýlanǵanyn moıyndamaı otyr
ASTANA. QazAqparat - Astanadaǵy daryndy balalarǵa arnalǵan №81 Astana English School gımnazııasynyń basshylyǵy oqýshylardyń jappaı ýlanǵanyn moıyndamaı otyr, dep habarlaıdy QazAqparat.
«Úsh oqýshy ǵana ózderin nashar sezingen, jappaı ýlaný bolǵan joq. Balalardyń asqazandary aýyrǵan, bireýi aýrýhanaǵa jetkizildi, qalǵan ekeýi úılerinde», - dedi mektep dırektorynyń orynbasary.
Onyń sózinshe, gımnazııada birden tekseris júrgizilgen, alaıda oqýshylardyń densaýlyǵyna zııan tıgizetin eshteńe anyqtalǵan joq.
«Polıtsııaǵa shaǵym túsirgender bolǵan joq. Degenmen bul oqıǵa tirkeýge alynyp, tekseris júrgizile bastady. Polıtsııa qyzmetkerleriniń habarlaýynsha, úsh balanyń ekeýi dárigerdiń tekserilýinen keıin úılerine qaıtarylǵan. Bir oqýshy aýrýhanada em qabyldap jatyr», - dep habarlady Astana qalasy Іshki ister departamentinen.
Eske sala keteıik, birqatar qazaqstandyq BAQ ókilderi 14 sáýirde atalmysh mekteptiń 20 oqýshysy tańǵy astan soń aýrýhanaǵa tústi dep habarlaǵan bolatyn.
Astanadaǵy daryndy balalarǵa arnalǵan №81 Astana English School gımnazııasy 2015 jyly ashyldy. Sabaq qazaq jáne aǵylshyn tilderinde ótedi. Mektep ashylǵan kezde oqytý quny 100 myń teńge bolady dep habarlanǵan edi. Gımnazııanyń resmı saıtynda ystyq tamaqpen qamtýdyń jospary jarııalanǵan. Ol boıynsha, 5-10 synyp oqýshylary úshin ystyq tamaqqa 54 450 000 teńge qarastyrylǵan.
