Astanadaǵy EQYU baǵdarlamalary keńsesiniń basshysy óz jumysynyń basymdyqtaryn atady
Tilshilerdiń uıymnyń Ortalyq Azııadaǵy jumys basymdyqtaryna qatysty qoıǵan saýalyna jaýap bergen D.Sabo: «Bizde Ortalyq Azııa jastaryn jaqyndastyrýǵa arnalǵan «Ortalyq Azııa jastarynyń jelisi» dep atalatyn óte jaqsy, dástúrli baǵdarlama bar. Bul baǵdarlamanyń jumys istegenine 11 jyl boldy ári jyl saıyn ótkiziletin sharalary da bar. Biz jastardyń bolashaǵyn oılaımyz. Qazirden bastap bir-birimen baılanys ornatqan jastar qandaı da bir uıashyq qura alady ári óńirdegi qarym-qatynastaryn odan ary damyta túsedi», - dedi ol.
Sonymen qatar keńse basshysy Qazaqstannyń óńirlik yntymaqtastyqty jaqtaıtyndyǵyn basa atap ótti.
«Biz muny qundylyq dep sanaımyz. Buǵan qosa sizderde qoǵamdaǵy áıelderdi qorǵaýǵa, kásipker áıelderdi qoldaýǵa baǵyttalǵan óte qyzyqty ári mazmundy jumystar júrgizilýde. Meniń Qazaqstanǵa kelgenime jarty jyldaı ýaqyt boldy. Osy ýaqyt aralyǵynda áıelderdiń óte belsendi ekendigin baıqadym. Jasyl ekonomıkany qoldaý sharalaryńyz da erekshe», - dedi ol.
Aıta keteıik, búgin Aqordada QR Memlekettik hatshysy Gúlshara Ábdiqalyqova men Astanadaǵy Eýropadaǵy qaýipsizdik jáne yntymaqtastyq uıymy baǵdarlamalary keńsesiniń basshysy Derd Sabo kezdesti. Júzdesý barysynda taraptar Qazaqstannyń EQYU aıasyndaǵy yntymaqtastyǵynyń jaı-kúıi men keleshegin talqyǵa saldy.
