Astanadaǵy ekshn-fılmder festıvalinde qazaq ánshisi Zıvara hanymnyń óneri amerıkandyq jáne eýropalyq maıtalmandardy qyzyqtyrdy
ASTANA. 2 shilde. QazAqparat - Keshe Astanada belgili rejısser Tımýr Bekmambetovtyń uıymdastyrýymen «Astana 2012» ekshn-fılmderi festıvaliniń saltanatty ashylýy boldy.
Elorda kúnine arnalǵan festıvalge Amerıka qurlyǵynan beldi rejısserler, prodıýserler, stsenarııshiler, óner adamdary aǵylyp keldi. Saltanatqa ózimizdiń qazaq óneriniń ókilderi Asanáli Áshimov, Rashıd Nuǵmanov, Aqan Sataev, Venera Nyǵmatýlına, Zıvara, Batyrhan Shúkenov, Ásel Saǵatovalar qatysty. Festıvalge qatysýshylar jınalǵan ónersúıer qaýymnyń qoshemetteýimen Astananyń tórinde ornalasqan Beıbitshilik pen kelisim saraıynyń aldynda tóselgen qyzyl kilem ústimen júrip ótti.
Budan keıin Úlken zalda kórermenderge Tımýr Bekmambetovtyń jańa úlgidegi 3D formatynda túsirilgen «Prezıdent Lınkoln: Qansorǵyshtardy aýlaýshy» atty fılmi usynyldy.
Festıvalda keremet erekshe daýysty qazaq ánshisi Zıvara hanym aqyn jáne kompozıtor Amanbek Aqaevtyń «Astana» ánimen óner súıerqaýymdy bir serpiltip tastady. Búginde qazaqtyń arý qyzy Zıvaranyń óneri Eýropa men Amerıkanyń óner maıtalmandaryn qyzyqtyryp otyr.
Bıylǵy festıval kóptegen jas kınematografısterge qoldaý kórsetýimen erekshelenip otyr. Astanaǵa Azııanyń, Beıjiń kınoakademııasynyń, Koreıa kınoóneri akademııasy men Kıoto ınstıtýty kıno mektepteriniń ókilderi qatysýda. Olardyń arasynda qazaqstandyq jas kınematografıster de bar. Úsh kún boıy olar sheberlik sabaqtaryna qatysyp, Astananyń sulý kelbetimen tanysatyn bolady. T.Bekmambetovtiń aıtýynsha, bul kúnderi Astana azııalyq kınematograftyń ortalyǵyna aınalmaq.
