Astanadaǵy eki lıtseıdiń basshysy jemqorlyq áreketteri úshin jaýapkershilikke tartyldy
ASTANA. 18 aqpan. QazAqparat /Gúlmıra Álıakparova/ - Astanadaǵy eki lıtseıdiń basshysy memlekettik satyp alýlar barysynda jemqorlyq áreketterge jol bergeni úshin isti boldy. Bul týraly qalalyq prokýratýradan habarlady.
Astanadaǵy «Almaty» aýdanynyń prokýratýrasy №1-shi jáne №5-shi kásibı lıtseılerde zańnama talaptarynyń kóptegen buzýshylyqtaryn anyqtady. Qadaǵalaý organynan málim etkendeı, anyqtalǵan buzýshylyqtardyń deni memlekettik satyp alýlardy baǵa usynymdaryn suratý tásilimen ótkizý kezinde oryn alyp, olardyń jemqorlyq sıpattary bolǵan.
Mysalǵa, 2010 jylǵy 18 mamyrda atalmysh tásilmen №1-shi lıtseıde jalpy somasy 1 200 000 teńgege jetim balalar úshin kıim-keshekterdi satyp alýǵa memlekettik satyp alýlar ótkizildi. Oǵan 13 áleýetti jetkizýshi qatysty. Onymen birge, eń tómengi baǵany usynyp otyrǵan eki jetkizýshi («Oldın-plıýs» JShS usynyp otyrǵan baǵasy 595 920 teńge, «Darın» JShS - 840 000 teńge), ıaǵnı is-júzindegi jeńimpazdar, kelisim-shartqa otyrýdan bas tartqan. Biraq lıtseıdiń basshylyǵy olardy memlekettik satyp alýlardyń jaýapsyz qatysýshylary retinde tizimge engizbegen. Solaı, «Memlekettik satyp alýlar týraly» QR Zańy 31-babynyń talabyn buzdy.
«№1-shi lıtseıdiń dırektory Zańnyń 31-baby, 12-bóliginiń talaptaryn buza otyryp, áleýetti jetkizýshiler tizimine enbegen «Tańgúl» JShS-men 1 176 000 teńge somasyna kelisimge otyrǵan. Osylaısha, dırektor memleketke 276 000 teńge kóleminde zalal keltirdi», - dep atap ótti elordalyq prokýratýrada.
Aýdan prokýrorlary, «Sybaılas jemqorlyq týraly» QR Zańyńa sáıkes №1-shi lıtseı dırektory N.Ábildınnyń bul is-áreketin jemqorlyqqa jaǵdaı týǵyzady dep tapty.
Osyǵan uqsas buzýshylyqtar №5-shi lıtseıdi tekserý barysynda da anyqtaldy.
Prokýratýradan málim etkendeı, tekserister nátıjesi boıynsha, «Almaty» aýdany prokýratýrasynyń usynymy negizinde jáne Astana qalasynyń Bilim basqarmasy bastyǵynyń buıryǵy boıynsha bilim berý mekemeleriniń basshylary qatań tártiptik jaýapkershilikke tartyldy.
