Astanadaǵy eki kópir qashan paıdalanýǵa beriledi
ASTANA. QazAqparat - Aǵymdaǵy jylda elordada eki avtomobıl kópiri paıdalanýǵa beriledi. Sondaı-aq, birneshe kóshede joldy jóndeý jumystary aıaqtalady, dep xabarlaıdy QazAqparat tilshisi.
Astana ákiminiń orynbasary Qosman Aıtmuxametovtyń aıtýynsha, aǵymdaǵy jylda kishi aınalma jolynyń qurylysy aıasynda Saraıshyq kóshesiniń jalǵasy - Turan men Beısekovanyń arasy qosylatyn bolady. Atalǵan ýchaskedegi jumystar qala kúnine deıin aıaqtalady degen jospar bar. "Budan bólek, Beısekova kóshesiniń 3 shaqyrym jolyn jóndeý jumystary jalǵasady. Abylaıxan dańǵyly men Qoshqarbaev kóshesi qıylysyndaǵy jol aıyryǵynyń qurylysy aıaqtalady", - dedi Q.Aıtmuxametov búgin xalyqqa esep berý kezdesýinde.
Onyń sózine qaraǵanda, bıyl eki avtomobıl kópiri paıdalanýǵa beriledi. "32 kóshede joldy jóndeý jumystary aıaqtalady. Sonyń jartysy Kóktal-2, Internatsıonalnyı men Mıchýrıno eldi mekenderine tıesili. Sondaı-aq, 60 kóshede jalpy uzyndyǵy 35 shaqyrym joldarda ortasha jóndeý jasalatyn bolady", - dep atap kórsetti Q.Aıtmuxametov.
Aıta keteıik, kezdesý kezinde "Grand Astana"-nyń turǵyndary ákimniń orynbasary Qosman Aıtmuxametovke lıfttiń qalaı qulaǵanyn aıtyp berdi.
