Astanadaǵy Dostyq jáne Qonaev kósheleri alty jolaqty bolýy múmkin - ІІD
ASTANA. QazAqparat - Elordadaǵy Dostyq pen Qonaev kósheleri alty jolaqtyǵa aınalýy múmkin. Bul týraly dóńgelek ústel barysynda Astana qalalyq ІІD ákimshilik polıtsııasy basqarmasynyń jol-tehnıkalyq ınspektsııasy bólimi bastyǵynyń orynbasary Nurlan Ývaev habarlady.
«Dostyq jáne Qonaev kóshelerin qaıta qurý jobasy ázirlendi, jobalyq-smetalyq qujattamasy tolyq anyqtalǵan, máseleniń qarjylyq jaǵy da belgili boldy. Bul eki kósheniń saraptamasy ótti, onda alty jolaqqa deıin keńeıtý qarastyrylǵan, barlyq qıylystarda oń jaqtan qulama joldar bolady, burynǵydaı tórt emes, alty jolaq», - dedi N.Ývaev.
Bul rette ol ázirge qaıta qurý jumystaryn júrgizýdiń múmkin datasyn boljaýǵa bolmaıtynyn atap ótti.
«Jyl saıyn jolaýshylar kóligi basqarmasy bıýdjet, jumys óndirisin kelesi jylǵa josparlap turady. Eger basqarma atalǵan qaıta qurýǵa bıýdjettik ótinim berse jáne ol bekitilse, árıne, joba iske asyrylady. Búginde qaıta qurý jumystaryn ótkizý qajettiligi týyndaǵan, biraq másele qarjylyq qarajatty anyqtaýǵa tirelip otyr. Búginde Astana qalasy ákimdiginiń tarapynan barlyq uıymdastyrýshylyq sharalar tolyq oryndalǵan. Bul joba jol qozǵalysy qaýipsizdigi boıynsha ákimshilik polıtsııa basqarmasymen kelisilgen», - dep habarlady N.Ývaev.
Ol bolýy múmkin keńeıtý atalǵan kóshelerdi tolyq qamtıtynyn atap ótti.
