Astanadaǵy «Dollar» atanyp ketken ǵımarattyń tarıhy

ASTANA. QazAqparat - Elordamyz astananyń aıshyqty ǵımarattarynyń biri búginde Qarjy mınıstrligi otyrǵan nysan ekendigi belgili. Arhıtektýrasy jáne tehnıkalyq jaǵynan aıryqsha etip salynǵan 12 qabatty Qarjy mınıstrliginiń ǵımaraty sol kezderi biregeı sáýlet úlgisi ǵana bolyp qoımaı, sondaı-aq tehnıkalyq jaǵynan kúrdeliligimen tańǵalarlyq qurylys bolǵan edi. Muny Elbasy Nursultan Nazarbaev ta óziniń «Eýrazııa júreginde» dep atalatyn kitabynda zor tebirenispen jazǵan bolatyn.

«Qazaqstan qarjy mınıstrliginiń ǵımaraty da óziniń jelbiregen jalaýdaı erekshe pishinimen kóz tartady. Ǵımarat keıde terbelgen tolqyndy elestetedi. Desek te, Astananyń kózi ótkir keıbir turǵyndary bul ǵımarattyń pishininen amerıkalyq dollardyń sulbasyn kóre qalypty. Sóıtip bul ǵımaratymyz «Dollar» atanyp ketti. Astanadaǵy osy kóz tartarlyq ǵımarattyń bas sáýletshisi, sáýlet jáne qala qurylysy departamentiniń dırektory Vladımır Laptevtiń túsindirýinshe, bul eń basynda, Qazaqstan Respýblıkasy Týynyń tasqa aınalǵan beınesi retinde oılastyrylǵan eken. Sáýletshilerdiń pikirinshe, kógildir qasbetke shaǵylysqan kún sáýlesi ǵımaratty jaıylǵan matanyń sýretine aınaldyrady, al kók júzinde kóshken qazbaýyr bulttardyń jóńkilgen kóleńkesi osy alyp matany jeldeı jelbiretip turǵandaı áserge bóleýi tıis. Bálkim, ǵımarattyń qasbeti barynsha kógildir bolmaı, sodan da ǵımarat-týdyń áseri jurtqa jetińkiremeı jatqan shyǵar. Soǵan qaramastan, ǵımarat pishininen astanalyqtardyń birinshi kezekte «dollardy» tap basýyn óz basym bóten kórmeımin. «Dollar» bolsa, «dollar» bolsyn... eń bastysy sulý da súıkimdi ǵımarat paıda boldy», - dep jazǵan edi Elbasy Nursultan Nazarbaev.

1999 jyly paıdalanýǵa berilgen ǵımarattyń jalpy aýmaǵy 32 400 sharshy metrdi quraıdy.