Astanadaǵy Densaýlyq festıvali Jeruıyq saıabaǵynda ótedi
ASTANA. 5 qyrkúıek. QazAqparat - Aldaǵy senbi, qyrkúıektiń 7-si kúni bastalatyn «Densaýlyq festıvali» respýblıkalyq aktsııasy Astanadaǵy Jeruıyq saıabaǵynda ótedi. Bul týraly búgingi baspasóz máslıhatynda Salaýatty ómir saltyn qalyptastyrý ortalyǵynyń dırektory Marat Qurmanov málim etti.
Onyń habarlaýynsha, ol jerde eń aldymen jappaı júgirý jarysy ótedi. Oǵan shamamen 4 myń adam qatysady. «Tańǵy saǵat 10:00-de Jeruıyq saıabaǵynda merekelik sharalar bastalady. Onyń aıasynda densaýlyq qalashyqtary jumys isteıdi. Qala turǵyndary sol jerge baryp, densaýlyqtaryn teksere alady. Bunyń barlyǵy tegin ótkiziledi», - dep atap kórsetti M.Qurmanov.
Aıta keteıik, bıylǵy Densaýlyq festıvaliniń urany - «Densaýlyǵym keremet - jattyǵýǵa kóp rahmet!». Onyń aıasynda respýblıka boıynsha san alýan kórmeler, vıktorınalar jáne baıqaýlar ótedi. Sondaı-aq sulýlyq pen densaýlyqqa arnalǵan taýarlar, sport ádebıetteri men durys tamaqtaný ónimderiniń jármeńkeleri uıymdastyrylmaq. Atalǵan festıval 1999 jyldan beri turaqty túrde ótkizilip keledi.
