Astanadaǵy daýyldyń nelikten aldyn ala boljanbaǵany belgili boldy
ASTANA. QazAqparat - Sınoptıkter keshe Astanada bolǵan quıyndy daýylǵa nelikten aldyn ala boljam jasalmaǵanyna túsinik berdi, dep habarlaıdy QazAqparat.
Qazgıdromettiń 21 mamyrdaǵy aýa raıy boljamyna sáıkes (múmkindik 90%), Aqmola oblysynda, sonyń ishinde Astana qalasynda kúndiz jańbyr, keı jerlerde burshaq, naızaǵaı bolady, jel soltústik-batystan 9-14m/s, keı jerlerde 15-20 m/s jyldamdyqpen soǵyp, túnde aýa temperatýrasy 10-15, kúndiz 16-24 gradýs bolady dep boljanǵan.
22 mamyr kúni Astana qalasynda jeldiń jyldamdyǵy sekýndyna 21 metrge jetti, Aqmola oblysynda 4-13 m/s, keı jerlerde 15-22 m/s boldy.
«Astana» meteostansasynda jergilikti ýaqyt boıynsha 13:15-ten 13:20-ǵa deıin baqylanǵan daýyldy jel, burshaq jáne nóser jergilikti sıpatta boldy. Jeldiń jyly jáne sýyq aýa massalarynyń bir-birimen soqtyǵý sebebinen kúsheıip, aýa temperatýrasyn 30 mınýt ishinde 25-ten 16 gradýsqa deıin kúrt tómendetti.
Jergilikti qubylystar qysqa merzimde jáne kútpegen jerde aýmaqtyń shekteýli kóleminde kúrt paıda bolady. Qazgıdromettiń qazirgi tehnıkalyq jabdyqtalýy olardy boljaýda qıyndyq týyndatty.
2018-2022 jyldary Qazgıdrometti jańǵyrtý aıasynda zamanaýı meteorologııalyq radarlar satyp alyp, ornatý kózdelgen. Olar osyǵan uqsas jergilikti qubylystardyń paıda bolýyn 3-6 saǵat buryn boljaýǵa jáne habardar etýge múmkin beredi. Qazaeronavıgatsııamen birlese otyryp, Qazaqstannyń barlyq aýmaǵyn 25 radardan turatyn radar jelisimen qamtý kózdelip otyr.
