Astanadaǵy daýyl: Áýejaıda ushaq ushyp-qoný jolaǵynan shyǵyp ketti
ASTANA. QazAqparat - Nursultan Nazarbaev áýejaıynda «Eır Astana» áýekompanııasynyń Shymkent - Astana baǵytyndaǵy ushaǵy qonǵannan keıin ushyp-qoný jolaǵynan shyǵyp ketken. Ushaq ishinde 106 adam bolǵan, dep habarlaıdy QazAqparat tilshisi Azamattyq avıatsııa komıtetiniń baspasóz qyzmetine silteme jasap.
«Búgin Astana áýejaıynda «Eır Astana» áýekompanııasynyń Shymkent - Astana baǵytyndaǵy KS352 reısiniń tirkeý nómiri P4-KVV Airbus-320 ushaǵy 13:22-de qonǵannan keıin, ushyp-qoný jolaǵynan shyǵyp ketti. Bortta 97 jolaýshy jáne 9 ekıpaj múshesi boldy. Áýe kemesi turaqqa jetkizildi. Qozǵaltqyshqa zaqym kelgen. Aerodrom 13 saǵat 30 mınýttan 14 saǵat 10 mınýtqa deıingi aralyqta jabylǵan bolatyn», - delingen habarlamada.
Qazirgi ýaqytta áýejaı shtattyq rejimde jumys istep jatyr.
Eske sala ketsek, Astanada búgin qatty daýyl soǵyp, burshaq aralas jańbyr jaýdy. Osynyń saldarynan Túrkistan kóshesindegi qurylys alańyndaǵy kran qulap, Beıbitshilik jáne kelisim saraıy ǵımaratynyń áınekteri syndy, Arnasaı kóshesindegi 127-turǵyn úıdiń, № 24 orta mekteptiń, Úrker shaǵyn aýdanyndaǵy №91 balabaqsha shatyry ushyp ketti. Sonymen qatar, 13 adam jedel járdem qyzmetin shaqyrtqan.
