Astanadaǵy dámhanalarǵa «salyq» salmaq bolǵan elorda men Pavlodar qalasynyń turǵyndarynan qurylǵan qylmystyq top quryqtaldy
ASTANA. Qarashanyń 2-si. QazAqparat /Aıdar Ospanalıev/ - Іshki ister mınıstrliginiń Krımınaldyq polıtsııa komıtetine qarasty Uıymdasqan qylmyspen kúres ortalyǵynyń qyzmetkerleri Astana men Pavlodar qalalarynyń turǵyndarynan qurylǵan qylmystyq top uıymdastyrǵan azamatty ustady.
Ol uıymdastyrǵan qylmystyq top ókilderi 1990 jyldardaǵydaı dámhanalarǵa «salyq» salmaq bolǵan. Bul oqıǵa jóninde búgin jýrnalıstermen bolǵan aptalyq brıfıngte Іshki ister mınıstrliginiń Til saıasaty jáne aqparat departamentiniń bastyǵy Qýanyshbek Jumanov baıandady, dep habarlaıdy QazAqparat.
Onyń aıtýynsha, qazirgi tańda qolǵa túsken baýkespeniń sybaılastary anyqtalýda. Sonymen qatar onyń Pavlodar óńirinde jasalǵan qylmystarǵa qatystylyǵy da tekserilýde. «Qylmystyq top ókilderiniń áreketteri jónindegi alǵashqy aqparat uıymdasqan qylmyspen kúres ortalyǵyna kelip túsken. Oǵan sáıkes, shildeniń 12-si kúni elordadaǵy Abaı kóshesiniń boıynda ornalasqan dámhanalardyń birine qymbat shetel kóligine mingen 8 azamat kelip, onyń ıesine ózderiniń «qamqorlyq» jasaǵysy keletindikterin, ol úshin qylmystyq top ókilderine aqsha tólep turý qajettigin aıtqan. Dámhana ıesi olardyń qamqorlyǵyn qajet etpeıtindigin bildirgen soń uıymdasqan top ókilderi oǵan qoqan-loqy kórsetken. Osy oqıǵadan keıin, ıaǵnı shildeniń 13-i kúni belgisiz bireýler atalmysh dámhananyń qyzmetkerlerine qaraqshylyq shabýyl jasap, olardy túrli qarýlardyń kómegimen soqqyǵa jyqqan. Kelgen shyǵyn 8 myń AQSh dollaryn qurady. Bul áreket boıynsha qylmystyq is qozǵaldy», dedi departament bastyǵy.
Osy qylmysty izdestirý barysynda tártip saqshylary Astana qalasynyń 36 jasar turǵynyn ustaǵan. Ol qaladaǵy qaýipsizdik fırmalarynyń biriniń quryltaıshysy bolyp shyqty jáne onyń Pavlodar qalasyndaǵy qylmystyq toptardyń birimen baılanysy bar ekendigi anyqtaldy.
