Astanadaǵy dámhanalardyń biri Meksıkadan muzdatylǵan kengýrý etin alyp kelgen
ASTANA. 29 qarasha. QazAqparat - «Ádilet» tutynýshylar quqyǵyn qorǵaý odaǵy sapasyz taýarlar men merzimi ótip ketken azyq-túlikterdiń dendep ketýine alańdaýly.
«Bizdiń júrgizilgen zertteýimizdiń nátıjesinde anyqtalǵany, elordadaǵy taýar satýshylardyń 80 paıyzynda sertıfıkattary joq bolyp shyqty. Bul bizdiń statıstıka, saýalnama kezinde kóptegen kásipkerler tipti sertıfıkat, deklaratsııa ne ekendigin de bilmeıdi. Elestetip kórińizder, biz olardan kıim-keshek, aıaq kıim, avtokólik jabdyqtaryn satyp alyp jatyrmyz», - deıdi búgin Astana ákimdiginde ótken dóńgelek ústel barysynda «Ádilet» tutynýshylar quqyǵyn qorǵaý odaǵy tóraǵasynyń orynbasary Tursyn Jaqparova.
Onyń aıtýynsha, atalmysh ahýaldy beı-bereket qurylǵan bazarlar odan ári ýshyqtyryp otyr. Bazarlarda «kóleńkeli» saýda-sattyq óte kóp. Kontrabandalyq jáne kontrafaktilik ónimderdiń mol kólemi sol jerlerde ótkiziledi. Qyzmet kórsetý sapasy da tómen.
«Moratorııdi paıdalanyp, úlken bassyzdyqqa jol berip jatqandar da tabylyp jatyr. Sizder bilesizder me, Astanadaǵy kafelerdiń biri Meksıkadan muzdatylǵan kengýrý etin alyp kelgen. Endi sony jartylaı fabrıkattardy jasaýǵa paıdalanýda. Kóptegen iri saýda ortalyqtarynan odan da soraqy oqıǵalar tirkelip jatyr. Kógerip ketken, merzimi qaıta basylǵan tamaq taýarlary jeterlik. Osyndaı qara nıetpen paıda tapqysy keletin kásipkerlerge qatysty sharalardy kúsheıtý qajet», - deıdi T.Jaqparova.
Búginde Astanada 3547 saýda-sattyq jáne qyzmet kórsetý nysany bar. Sonyń ishinde 25 bazar bar jáne tirkelmegen kásipkerler jappaı saýda jasap jatyr. Sonymen qatar 705 taýar Reseı, Belarýs, Ýkraına, Qyrǵyzstan, Ózbekstan, Qytaı, Brazılııa jáne ózge de alys shet memleketterden ákelinedi. «Ádilet» mamandarynyń habarlaýynsha, kóp jaǵdaıda olardyń sapasy tómen.
