Astanadaǵy «Burqasyn-2015» shańǵy merekesine 3 myńnan astam elordalyq qatysty
ASTANA. QazAqparat - Búgin Astanada Esil ózeni boıyndaǵy qalalyq saıabaqta jyldyń basty shańǵy merekesi «Burqasyn-2015» ótti, dep habarlaıdy elorda ákimdiginiń baspasóz qyzmetinen.
Uly Otan soǵysyndaǵy Jeńistiń 70 jyldyǵyna, Qazaq handyǵynyń 550 jyldyǵyna, Qazaqstan halqy Assambleıasy jylyna jáne QR Konstıtýtsııasynyń 20 jyldyǵyna oraılastyrylǵan jarys Astana qalasynyń Týrızm, dene tárbıesi jáne sport basqarmasymen uıymdastyryldy. Іs-sharaǵa 3000-nan astam elordalyq qatysty. Sonyń ishinde mektep oqýshylary, stýdentter, oqý oryndarynyń ustazdary, Qazaqstan Respýblıkasynyń mınıstrlikteri men vedomstvolarynyń jáne elordadaǵy memlekettik qurylymdar men kásiporyndardyń qyzmetkerleri, qoǵam ókilderi, sondaı-aq qala qonaqtary boldy. «Bul Astana úshin óte mańyzdy kún. Osy qala ákimdigi men Sport jáne dene shynyqtyrý basqarmasynyń uıymdastyrýymen shańǵy tebý uıymdastyryldy. Óte tamasha. Jarysqa úsh myńǵa jýyq adam qatysty. Ózim de qatystym. Zeınetkerler de, jastar da bar eken», - deıdi QR Parlamenti Májilisiniń depýtaty Abaı Tasbolatov. «Burqasyn-2015» - bul otbasylyq jáne korporatıvtik demalys túrleriniń biri. Dástúrge aınalǵan buqaralyq sport merekesi bıyl 13-shi ret ótkizildi. Astana qalasy Týrızm, dene tárbıesi jáne sport basqarmasynyń basshysy Berik Marjyqpaevtyń aıtýynsha, qatysýshylar shańǵy festıvalinde jaqsy óner kórsetti. Jarys baǵdarlamasyna erler, áıelder, jigitter, qyzdar, balalar, zeınetkerler jáne múmkindigi shekteýli jandar arasyndaǵy jarystar engen. Dástúrli shańǵy jarysynyń jeńimpazdary estelik júldeler men syılyqtarǵa ıe boldy.
