Astanadaǵy boran: Mamandar birneshe mańyzdy keńes berdi
NUR-SULTAN. QazAqparat – Nur-Sultan qalasynyń Tótenshe jaǵdaılar departamenti qala turǵyndary men qonaqtaryna qala syrtyna shyǵýdan bas tartyp, asa saq bolýdy, aýa raıynyń ózgerýi men engizilgen shekteýler týraly aqparatty qadaǵalaýdy usynady, dep habarlaıdy QazAqparat tilshisi qala ákimdiginiń baspasóz qyzmetine silteme jasap.
Ákimdiktiń habarlaýynsha, aýa raıynyń kúrt ózgerýine baılanysty búgingi kúni Nur-Sultan-Qorǵaljyn baǵytynan basqa barlyq tasjoldar jabylǵan. Sondaı-aq qalalyq Bilim basqarmasynyń sheshimine saı 1-aýysymdaǵy 0-11-synyp oqýshylary men birinshi aýysymdaǵy 1-2-kýrs kolledj stýdentterine sabaq toqtatylǵan.
«TJD málimeti boıynsha «112» shuǵyl telefon qyzmetine túngi 00.00-den bastap 1639 qońyraý kelip túsken, onyń 85 paıyzy tasjoldyń ashylýy men sabaqty toqtatý máseleleri boıynsha habarlasqan. Ótken táýlik ishinde elordalyq qutqarýshylar qar qursaýynda qalǵan 19 adamdy qutqardy. Al jyl basynan beri qar qursaýynan 62 adam qutqarylyp, 5 adam evakýatsııalanǵanyn aıta ketken jón. Osy rette Tótenshe jaǵdaılar departamenti qala turǵyndary men qonaqtaryna qala syrtyna shyǵýdan bas tartyp, aýa raıynyń ózgerýi jáne engizilgen shekteýler týraly aqparatty qadaǵalaýdy usynady. Atalmysh málimetti astanalyqtar «112» qyzmeti, «Smart Astana» qosymshasy, «Instagram» áleýmettik jelilerinde (@nursultan_tjd), sondaı-aq «Darmen» qosymshasy arqyly bile alady», - dep habarlaıdy ákimdikten.
Mamandar qala turǵyndaryna kóshede baǵandardan, aǵashtardan, jarnamalardan, EJJ jáne symdardan alys júrýdi, avtokólikti aǵashtar men eski qurylystardan alshaq qoıýdy, qurylys alańdarynda múmkindiginshe qurylys-montaj jumystaryn shekteýdi usynady. Sondaı-aq, órt qyzmeti, polıtsııa, tótenshe jaǵdaılar departamenti, jedel medıtsınalyq kómek, kommýnaldyq qyzmetter sııaqty qalanyń tynys-tirshiligin qamtamasyz etý uıymdaryn qospaǵanda, aýa raıynyń kúrt nasharlaýyna baılanysty jáne qaıǵyly jaǵdaılardy boldyrmaý úshin memlekettik organdarǵa, bilim berý mekemelerine, kásipkerlik obektilerine (bazarlar, SOO), qurylysqa jumys kúnin qysqartý usynylady.
Qazgıdromet málimetine sáıkes búgin Nur-Sultanda qar jaýyp, boran soǵady, kóktaıǵaq bolady. Ońtústik-batystan soqqan jeldiń ekpini 23 m/s deıin jetedi.
Aıta ketsek, elordada qys bastalǵaly qatty qar jaýǵan. 2019 jyldyń qarasha aıynda túsken qar mólsheri 47 mm, jeltoqsanda 39 mm qurasa, 23 qańtardaǵy jaǵdaı boıynsha 16 mm, aılyq normada 37 mm qar jaýǵan. Osylaısha, kórsetilgen kezeńde túsken qar mólsheri aılyq normadan 2 ese asyp tústi.
Aıan Bekenuly
