Astanadaǵy boran: Bir túnde 27 myń tekshe metr qar shyǵaryldy
NUR-SULTAN. QazAqparat – Nur-Sultan qalasynyń ákimdigi elorda kóshelerin qardan tazartý jumystary týraly baıandady, dep habarlaıdy QazAqparat.
«22 qańtardan 23 qańtarǵa qaraǵan túni 1053 tehnıka men 211 jumysshy qala kóshelerin qardan tazartty. Bul túni 27 485 tekshe metr qar shyǵaryldy, ol úshin 2 290 reıs jasaldy», - dep habarlady elordalyq ákimdiktiń baspasóz qyzmeti.
Búgin 23 qańtarda qar tazalaý jumystaryna 1 127 tehnıka men 1700 jol jumysshysy tartyldy. Jalpy osy ýaqytqa deıin 182 649 reıspen 2 191 788 tekshe metr qar shyǵarylǵan.
Sondaı-aq, 23 qańtar kúni tańǵy 8.00-de qalalyq tótenshe jaǵdaılar departamentiniń Jedel shtaby qurylǵan.
Saǵat 15.00-degi jaǵdaı boıynsha: elordalyq TJD qutqarýshylary 27 adamdy qar qursaýynan qutqardy, 21 jeńil avtokólik pen 1 avtobýs súırep shyǵaryldy. Qutqarý jumystary jalǵasýda.
Buǵan deıin Nur-Sultan qalasynyń ákimi Altaı Kólginov elorda kóshelerin qardan tazartý úshin qosymsha tehnıka alý qajettigin aıtqan edi.
