Astanadaǵy bombapanada bolǵan órttiń shyǵý sebebin tıisti komıssııa anyqtaıtyn bolady - V. Bojko
ASTANA. Aqpannyń 19-y. QazAqparat /Ernur Aqanbaı/ - Astana qalasyndaǵy bombapanada bolǵan órttiń shyǵý sebebin arnaıy qurylǵan komıssııa anyqtaıtyn bolady. Bul týraly búgin Úkimet otyrysynan keıin jýrnalısterge Tótenshe jaǵdaılar mınıstri Vladımır Bojko aıtty,
dep habarlaıdy QazAqparat.
«Órttiń shyǵý sebebi tekserý barysynda anyqtalady. Qylmystyq is qozǵalatyn bolady. Men buıryǵymmen tıisti komıssııany bekittim. Іstiń baıybyna komıssııa baratyn bolady», dedi V. Bojko.
Onyń aıtýynsha, qazirgi ýaqytta bombapanadaǵy órt aýyzdyqtalyp qana qoımaı, tolyǵymen sóndirildi. «Órtti sóndirý kezinde barlyq sharalar atqaryldy. Biz Qaraǵandydan jabyq jerlerdegi aýany soryp alatyn qurylǵyny alyp keldik. Ol qurylǵy jabyq jerdegi kıslorodty soryp alyp, órt úderisin basý úshin qoldanylady. Ol qurylǵy keshe kúni boıy jumys istedi jáne óziniń rólin atqara aldy. Biz búgin tańerteń bombapananyń ishine kirýge múmkindik aldyq. Onda qaza tapqan adamdardy taýyp, olardyń denesin syrtqa shyǵardyq», dedi V. Bojko.
Mınıstr órtti sóndirý kezinde úsh adamnyń qaza tapqanyn aıta kele: «Órtti sóndirý qıyn bolǵan jaǵdaıda, bizdiń júıege sáıkes, komandırler aldyńǵy shepte júredi, jeke quramdy táýekelge ıtermelemeıdi, jaýapkershilikti ózderiniń moınyna alady. Adamdardyń qaza tapqany ókinishti. Olar kásibı deńgeıi joǵary, óte jaýapkershilikti adamdar bolatyn. Olar ómir boıy órt sóndirý qyzmetinde jumys jasaǵandar», dedi.
Onyń aıtýynsha, órt shyqqan bombapana Astana qalasynyń múlki bolyp tabylady. Onda halyqty qorǵaýǵa arnalǵan múlikter aıtarlyqtaı kóp kólemde saqtalǵan.
