Astanadaǵy bombapanada bolǵan órtti sóndirý kezinde úsh adam qaza tapty - mınıstr V. Bojko
ASTANA. Aqpannyń 19-y. QazAqparat /Ernur Aqanbaı/ - Astana qalasyndaǵy bombapanada bolǵan órtti sóndirý kezinde úsh adam qaza tapty.
Bul týraly búgin Úkimet otyrysynda Tótenshe jaǵdaılar mınıstri Vladımır Bojko aıtty, dep habarlaıdy QazAqparat.
«Órtti sóndirý barysynda úsh basshy qaza tapty. Olar Astana qalasynyń Tótenshe jaǵdaılar departamenti bastyǵynyń orynbasary polkovnık Zaıtsev, departamenttiń altynshy órt sóndirý bóliminiń bastyǵy Kákishev, arnaıy órt sóndirý bólimi qyzmeti bastyǵynyń orynbasary Ábeev», dedi otyrysta V. Bojko.
Onyń aıtýynsha, qaza tapqandardyń denesi búgin tańǵy saǵat 7-lerde tabylǵan. Kesheden beri departamentter men mınıstrlikter jumys isteýde. Men keshe órttiń shyǵý jáne oryn alǵan qaıǵyly jaǵdaıdyń sebepterin anyqtaý jóninde qaýlyǵa qol qoıdym. Mınıstrliktiń jáne departamenttiń jelisi boıynsha barlyq sharalar qabyldanýda, dedi mınıstr.
Onyń aıtýynsha, órt shyqqan bombapanadaǵy órttiń jalpy aýdany 500 sharshy metr jerdi qamtyǵan. «Bul kúrdeli bombapana bolǵandyqtan jáne qabyrǵasy men shatyry aıtarlyqtaı qýatty bolǵandyqtan órtti sóndirý qıyn boldy», dedi V. Bojko.
Aıta keteıik, Astana qalasyndaǵy Yqylas Dúkenuly atyndaǵy kóshedegi tehnoparktiń aýmaǵynda ornalasqan bombapananyń ishinde órt aqpannyń 17-si kúni tańǵa jýyq shyqqan bolatyn. Órttiń aýmaǵy shamamen 500 sharshy metrdi qamtyǵan. Al bombapananyń jalpy aýmaǵy 1080 sharshy metr.
