Astanadaǵy boks keshi: Nursultan Jańabaevtyń qarsylasy anyqtaldy

ASTANA. QazAqparat - Birinshi orta salmaqta WBA China chempıondyq belbeýiniń ıegeri Nursultan Jańabaevtyń 9 qyrkúıek kúni elorda tórinde ótetin boks keshindegi qarsylasy anyqtaldy, dep habarlaıdy QazAqparat tilshisi.

Otandasymyz 37 jastaǵy brazılııalyq Aleks Sandro Dýartemen judyryqtasatyn boldy. Aleks Sandro Dýarte kásipqoı boksta 15 kezdesý ótkizip, onyń 13-inde jeńiske jetse, bir kezdesýde jeńilip, bireýinde teń túsken.

Al Nursultan Jańabaev kásipqoı boksta eki jekpe-jek ótkizip, ekeýinde de jeńiske jetken bolatyn. Ol alǵashqy aıqasyn 2016 jyly Qytaıda bastady.  Al sońǵy kezdesýinde WBA China ataǵyn jeńip aldy. Qazir Jańabaev Qanat Islammen birge Astanada jekpe-jekke qyzý daıyndyq ústinde. 

Eske sala keteıik, "EKSPO" halyqaralyq kórmesi aıasynda 9 qyrkúıek kúni Astanadaǵy «Saryarqa» velotreginde boks keshi ótip, onda Qanat Islam (24-0,19 KO) kanadalyq Brendon Kýkpen (18-0, 11KO) judyryqtasady. Boksshylar birinshi orta salmaqtaǵy IBF tıtýlyna úmitkerlikke talasady. Osy jekpe-jektiń anderkartynda qazaqstandyq 8 boksshy óner kórsetedi. Olar - Janqosh Turarov (21-0, 15KO), Jánibek Álimhanuly (1-0, 1KO), Meıirim Nursultanov (3-0,2KO), Rýslan Myrsataev (3-0, 3KO), Álı Ahmedov (7-0,5KO), Aıdos Erbosynuly (6-0, 6KO), Dımash Nııazov (11-0-3, 5KO) jáne Nursultan Jańabaev.