Astanadaǵy boks keshi: Nursultan Jańabaev ýádesinde turdy
ASTANA. QazAqparat - Búgin Astanadaǵy boks keshinde Nursultan Jańabaev (2-0, 1KO) brazılııalyq Aleks Dýarteni (12-1-1, 9 KO) nokaýtpen jeńdi, dep xabarlaıdy QazAqparat tilshisi.
Birinshi raýndta Nursultan Jańabaev óz qarsylasymen kóp ańdysqan joq. Birden ashyq shabýylǵa kóship, aýyr soqqylaryn jaýdyrdy. Onyń bul taktıkasy óz nátıjesin berdi. Oń qolymen ótkizgen djebi qarsylasyn sál eseńgiretse, sol qolymen urǵan soqqysy nokaýtqa túsirdi. Aleks Dýarte turdy. Alaıda tóreshi jekpe-jekti toqtatýǵa sheshim qabyldady.
Buǵan deıin Nursultan Jańabaev kásibı bokstaǵy eki jekpe-jegin Qytaı jerinde ótkizdi. Osy joly týǵan jerindegi alǵashqy kezdesýin sátti aıaqtap, kúni keshe qarsylasyna aıtqan sózin oryndap otyr.
«Shynymdy aıtsam, birinshi raýndta nokaýt bolady dep oılaǵan joqpyn. Biraq birinshi raýndtan shyǵa salyp, qazaqtyń kim ekenin kórsetip, shekesine bir-eki jaqsy soqqy jasaý oıda boldy, negizi. Ózim Qanat aǵanyń janynda jattyqtym. Sonyń arqasynda jeńiske jettim dep oılaımyn», - deıdi Nursultan Jańabaev.
Aıta keteıik, keshegi salmaq ólsheý rásimi kezinde Dımash Nııazov óz qarsylasymen tóbelesip qala jazdady. Edýardo Pereıra kóz arbasyp turǵanda iligise ketti. Biraq Dımash óziniń sypaıy minezinen aınyǵan joq .
Brazılııalyqtyń osy bir áreketine namystanǵan Nursultan Jańabaev salmaq ólsheýge shyqqanda óz qarsylasyna: «Kór de tur, erteń seniń belbeýińdi alyp qoıamyn!», - dep aıqaı saldy.
Búgingi boks keshiniń basty jekpe-jeginde Qanat Islam (24-0, 19KO) kanadalyq Brendon Kýkke (18-0, 11KO) qarsy shyǵady. Olar birinshi orta salmaqtaǵy WBA Inter-Continental jáne WBO-NABO nusqasynyń chempıondyq ataqtaryn sarapqa salatyn bolady.
Boks keshin «Qazsport» telearnasy tikeleı efırde kórsetip jatyr. 20:00-ge «Qazaqstan» ulttyq arnasy da tikeleı efırge shyǵady. Budan bólek, Fite.tv ınternet arnasy, sondaı-aq TVtibi men Flipps arqyly tikeleı reportajdar júrgiziledi.
Alǵashqy jekpe-jekte qazaqstandyq boksshy Meıirim Nursultanov bir mınýttyń ishinde óz qarsylasyn nokaýtpen jeńdi .
Al «Nıý-Iorktyń úzdik polıtseıi» Dımash Nııazov elirgen qarsylasynsabasyna túsirdi .
Qazaqtyń jas nokaýtery Aıdos Erbosynuly da kezekti jeńisine jetti.
Al Álı Axmedov óz qarsylasyn texnıkalyq nokaýtpen jeńdi.
