Astanadaǵy boks keshi: Qarsylastan qaımyǵatyn men emes – Jánibek Álimhanuly

ASTANA. QazAqparat - 9 kyrkúıek kúni Astanada Qanat Islam men Brendon Kýktyń jekpe-jegine arnalǵan boks keshi ótedi. Keshtiń anderkartynda sharshy alańǵa shyǵatyn boksshylardyń biri Jánibek Álimhanuly QazAqparat tilshisine bergen suhbatynda óz qarsylasy - brazılııalyq Karmelıto de Jezýsti betpe-bet birinshi ret kórip otyrǵanyn aıtty.

-         Jánibek, erteń keshkisin aıqas bolady. Qobaljý bar ma?

-         Aıtarlyqtaı qatty bir alańdap, qobaljyp júrgenim joq. Halyq aldynda rıngke shyqpaǵaly kóp boldy. Rıngti saǵynyp qalǵan sııaqtymyn.

-         Erteńgi aıqasqa tas-túıin daıynmyn deısiń ǵoı?!

-         Osy jekpe-jekke daıyndalyp, jattyǵý jasaǵanyma biraz boldy. Qazir naǵyz babymdamyn. Qarsylasymnan qaımyǵaıyn dep turǵanym joq.

-         Qarsylasyńmen buryn-sońdy kezdestińizder ma?

-         Joq, buryn múlde tanymaıtynmyn. Júzin Astanaǵa kelgende ǵana kórdim. Alaıda, brazılııalyq Karmelıto de Jezýspen judyryqtasatynym belgili bolǵanda, onyń kim ekenin ınternet jelisinen bildim. Maǵan deıin ótkizgen barlyq aıqastaryn jaqsylap kórip shyqtym.

-         Erteń kásibı rıngtegi ekinshi aıqasyń bolady. Al qarsylasyń osyǵan deıin 23 kezdesý ótkizip tastapty, onyń 15-in nokaýtpen aıaqtaǵan. Tájirıbesi jaǵynan basymyraq dep oılamaısyń ba?

-         Ony erteńgi sharshy alań kórsetedi. Mennen birneshe kóılek buryn tozdyrǵanynan qorqyp, sasatyn men emes. Kez kelgen qarsylasqa daıynmyn.

-         Osy boks keshinde sátti óner kórsetip jatsań, kásipqoı bokstaǵy mansabyńdy jalǵastyrasyń ba?

-         Joq, Alla qalasa, bıylǵy el birinshiligine qatysyp, Ulttyq quramadaǵy ornymdy saqtap qalǵym keledi. Áýesqoı boksta júrip te, kásipqoı boksqa iz salýǵa bolady ǵoı. Men úshin bul jekpe-jekter tájirıbe bolmaq. Negizi, bokstaǵy jolymdy bir ózim ǵana sheshpeımin. Keńes beretin aǵalarym bar. Olarǵa da qulaq asýym kerek.

-         Áńgimeńizge rahmet! Biz de saǵan jeńis tileımiz. Sáttilik bolsyn!