Astanadaǵy boks: Aıdyn Eljanov ázerbaıjandyqtan basym tústi

ASTANA. QazAqparat - Qazaqstandyq kásipqoı boksshy Beıbit Shúmenovtyń boks keshi aıasynda otandasymyz Aıdyn Eljanov Ázerbaıjan boksshysy Aqsar Ragımovpen sharshy alańǵa shyqty, dep habarlaıdy QazAqparat tilshisi.

Birinshi raýnd kórsetkendeı, eki boksshy da myqty tehnıkaǵa ıe. Qysqa djebamder dál soqqy jasap, ýaqtyly syrǵyp ketýden ekeýi de sheber bolyp shyqty. Urymtal sátterdiń birinde qazaqstandyq boksshy qarsylasynyń jaǵy tusynan keremet soqqy ótkizgendeı bolǵan. Alaıda Ragımov esin jınap alǵan soń boksshylardyń «bıi» qaıta jalǵasty. Óz kezeginde ázerbaıjandyq boksshy da soqqy berý jaǵynan qur alaqan emes ekenin dáleldedi.

Ekinshi raýnda boksshylardyń bir-birine jasaǵan qarymta soqqysymen bastaldy. Óz alańynda júrmegenin sezgendikten be, ázerbaıjandyq bir soqqyǵa birneshe soqqymen jasap berýge tyrysyp baqty. Alaıda sermegen judyryqtarynyń kóbi aýany «qaýyp» jatqan edi. Al qazaq boksshysy bolsa, sabyrly da saýaty qımylymen qarsylasyn sharshatý ádisine basymdyq berdi.

 Úshinshi raýndta Aıdyn Eljanov aıqasty ýaqytynan buryn aıaqtaýǵa baryn saldy. Alaıda qarsylasynyń qolynyń uzyndyǵy buǵan mursat bermegen edi. Qýlyqqa da basyp kórgen Aıdyn qarsylasyna edáýir jaqyndap, táýekelge de baryp júrdi.

Aqyry aıqas nokaýtsyz aıaqtaldy. Tóreshilerdiń biraýyzdan qabyldaǵan sheshimimen Aıdyn Eljanov jeńiske jetip, kásipqoı boksta besinshi ret jeńis týyn jelbiretti.

Eske sala ketsek, Shúmenov pen Altynkaı aıqasynyń arderkartynda qazaq boksshylary tórt jeńiske nokaýt arqyly qol jetkizgen bolatyn.