Astanadaǵy bilim berý mekemelerine aýdıt júrgiziledi
ASTANA. QazAqparat - Astanadaǵy bilim berýdi damytýǵa arnalǵan baǵdarlamanyń jobasy daıarlandy. Atalǵan qujatty aldymen sarapshylardyń talqylaýynan ótkizý josparlanǵan. Negizgi maqsat - balabaqsha, mektep pen kolledjderdiń bilim berý sapasyn kóterý, dep xabarlaıdy QazAqparat tilshisi.
"Búgin biz baǵdarlamanyń jobasyn alǵash ret talqyǵa salyp otyrmyz. Sonyń aıasynda qaladaǵy barlyq bilim berý mekemelerinde aýdıt ótkizip, bilim berý sapasyn kóterýdiń ózekti máselelerin anyqtaýdy kózdeımiz. Balabaqsha men mektep oryndarynyń tapshylyǵy bylaı tursyn, ustazdardyń kásibı biliktiligi, oqytý ádistemeleri jáne taǵy basqa problemalar zerdelenedi. Sóıtip, árbir mekemeniń problemalaryn anyqtaý qajet. Osy oraıda úzdik balabaqshalar, mektepter men kolledjderdiń tájirıbesi keńinen qoldanylady. Osylaısha, bilim berý mekemeleriniń ózara tájirıbe almasýlaryn kúsheıtip, qalanyń bilim berý sapasyn kóterý kerek. Bizdiń negizgi maqsatymyz - bilim berý mekemeleriniń tájirıbelik alshaqtyǵyn barynsha azaıtý, bilimniń sapasyn birkelki etý. Qalanyń shetki aýdandary jalpy bilim berý sapasynan qalmaýy tıis", - deıdi Astana qalalyq bilim berý basqarmasy basshysynyń mindetin atqarýshy Ánýar Janǵozın.
Onyń aıtýynsha, jańa baǵdarlamany talqylaýdan ótkizgennen keıin arnaıy sarapshylar toby qurylýy múmkin. Atalǵan top Astanadaǵy bilim berý mekemeleriniń oqytý sapasyn tekseretin bolady. Ol jumysty jańa jyldan bastaý josparlanyp otyr.
