Astanadaǵy bı keshinen keıin 11 synyp oqýshysy jaraqat aldy
ASTANA. QazAqparat - Elordadaǵy Oqýshylar saraıy aýmaǵynda ártúrli mektepterde 11-synypta oqıtyndar úshin uıymdastyrylǵan bı keshinen keıin er bala jaraqat aldy, dep habarlaıdy QazAqparat.
Astana qalasy bilim basqarmasy málimetine súıensek, qazirgi kezde bala aýrýhanada em qabyldap jatyr. Onyń densaýlyq jaǵdaıy turaqty.
Sonymen qatar elorda Іshki ister departamentiniń habarlaýynsha, kúdikti adam anyqtalyp, ustaldy. Qazirgi kezde sotqa deıingi tergeý amaldary júrip jatyr. Zańnamaǵa sáıkes, sotqa deıingi tergeýdiń málimetteri jarııalaýǵa jatpaıdy.
«Eger de tergeý múddesine qaıshy bolmasa, derekter prokýrordyń ruqsatymen tıisti tártipte jarııa etýli múmkin. Sonymen qatar bul jaǵdaıda basqa adamdardyń quqyǵy men zańdy múddesi buzylmaýy tıis», - delingen ІІD habarlamasynda.
Budan bólek, atalǵan oqıǵaǵa qatysty Oqýshylar saraıy dırektorynyń orynbasary Nabıbýlla Dosbolov ta pikir bildirdi.
«Bul aýmaqqa ákimdik qyzmet kórsetedi. Sonymen qatar atalǵan oqıǵa Oqýshylar saraıy ǵımaratynan tys jerde oryn aldy. Bala osy nysanǵa kelip júrgen joq. Olar serýendeý maqsatynda syrtta bolǵan jáne oqıǵa mektep oqýshylary arasyndaǵy janjaldan týyndaǵan. Balalardyń bizge esh qatysy joq», - dedi ol.
Onyń aıtýynsha, bı keshi №51 mekteptiń ótinimi bıynsha uıymdastyryldy.
