Astanadaǵy beınebaqylaý: Tártip buzýshylyqtar qalaı tirkeledi
ASTANA. QazAqparat - QR ІІM Ákimshilik polıtsııa komıtetiniń tóraǵasy Igor Lepexa Astanadaǵy beınebaqylaý júıesi týraly aıtyp berdi, dep xabarlaıdy QazAqparat tilshisi.
Onyń aıtýynsha, qazirgi kezde jedel basqarý ortalyǵyna 800 kamera qosylǵan. Budan bólek, "Sergek" júıesin ıntergatsııalaý jumysy atqarylyp jatyr. Alaıda barlyq kameralar áli bir arnaǵa qosylmady. Degenmen, jol qozǵalysy boıynsha tártip buzýshylyqtar avtomatty túrde tirkeledi. Sonyń nátıjesinde kólik júrgizýshileri erejeni kóp buzbaıtyn boldy. "Al jańaǵy 800 kamera týraly aıtar bolsaq, áli de biraz kemshilikter bar. Iá, qandaı da bir qylmys bolǵanda ol kamera basqa jaqqa qarap turýy múmkin. Sodan tártip buzýshylardyń áreketi jazylmaı qalady. Kamera eki jaqqa aınalyp turady ǵoı. Sosyn bizge operatorlar jetispeı jatyr. Bir aýysymda 4-5 beıneoperator jumys isteıdi. Endi, adam faktory bolady, operator basqa jaqqa qarap qalady, ornynan turyp ketedi jáne taǵysyn taǵy. Sondyqtan bizge ıntellektýaldy kameralar kerek. Іshki ister mınıstrligi osy baǵytqa basymdyq berip otyr. Sebebi ondaı qurylǵylar ózdigimen operatorǵa sıgnal beredi", - dedi I. Lepexa Astanada ótken baspasóz máslıxatynda.
Aıta keteıik, Astana kúni qarsańynda elordanyń quqyq qorǵaýshylary, sondaı-aq úsh oblystyń jeke quramy kúsheıtilgen rejimge kóshetin bolady. QR ІІM memlekettik til jáne aqparat departamentiniń dırektory Almas Sádýbaevtyń aıtýynsha, 27 maýsym men 8 shilde aralyǵynda astanalyq garnızon, sondaı-aq Aqmola, Qaraǵandy jáne Pavlodar oblystarynyń jeke quramy kúsheıtilgen rejimge kóshiriledi.
"Ol kúnderi elorda aýmaǵynda qoǵamdyq tártipti polıtsııanyń kúsheıtilgen jasaqtary baqylaıdy. Al merekelik sharalar ótetin jerlerde táýlik boıy kezekshilik júrgiziledi", - dedi A.Sádýbaev Astanada ótken baspasóz máslıxatynda.
Al QR ІІM Ákimshilik polıtsııa komıtetiniń tóraǵasy Igor Lepexa mereke kúnderi mas bolǵan adamdardy ustap áketýge qatysty túsinik berdi.
