Astanadaǵy bes qabatty turǵyn úıde órt shyqty
ASTANA. QazAqparat - Búgin túnde Astanadaǵy bes qabatty turǵyn úıde oryn alǵan órt sóndirildi.
«29 maýsym kúni 02:35-te órt sóndirý qyzmetine Birjan sal kóshesi, 2/1 úı, №3 kireberisin tútin alyp ketken jóninde habar kelip tústi. Órt ornyna 29 jeke quram qyzmetkeri, 5 negizgi jáne 2 arnaıy órt sóndirgish avtokólik jiberildi. 02:45-te birinshi órt sóndirý bólimi shaqyrylǵan jerge jetkende bes qabatty úıdiń birinshi qabatyndaǵy aýmaǵy 7 sharty metr qoıma órtengeni anyqtaldy. Búkil kireberis tútinge oranǵan. Adamdardyń ómirine úlken qaýip tóndi, turǵyndardyń kóbi joǵarǵy qabattarda qamalyp qaldy», - dep habarlaıdy Astana qalalyq Tótenshe jaǵdaılar departamentiniń baspasóz qyzmeti.
Atalǵan oqıǵada adam ómirine qaýip tóngendikten №2 rang qaýiptilik jarııalandy.
Gaz-tútinnen qorǵaý tobynyń kómegimen jáne órt sóndirý satylary arqyly 8 adam qutqaryldy, onyń tórteýi balalar jáne 70 adam qaýipsiz jerge kóshirildi, olardyń arasynda on bala bar.
«Turaqqa qoıylǵan avtokólikterdiń kesirinen avtosatylar men búgilmeli avtokótergish qoıatyn múmkindik bolmaı, órt sóndirý bólimsheleriniń jumysynda qıyndyqtar týyndady. Órt kezinde 8 negizgi, 6 arnaıy órt sóndirý avtókólikteri, 56 jeke quram qyzmetkeri qatysty. 03:17-de órt tolyǵymen aýyzdyqtaldy. Órttiń týyndaý sebepteri anyqtalýda », dep málim etti qalalyq TJD.
