Astanadaǵy «Belsendi uzaq ómir súrý ortalyǵy» 7 myńnan astam qarııaǵa qyzmet kórsetedi
ASTANA. QazAqparat – Astana qalasy ákimdiginiń «Belsendi uzaq ómir súrý ortalyǵy» KMM dırektory Muhtar Erketaev ortalyqtyń jumysy týraly aıtyp berdi, dep habarlaıdy QazAqparat tilshisi.
«Belsendi uzaq ómir súrý ortalyǵynyń ashylǵanyna 4 jyldan astam ýaqyt ótti. Osy aralyǵynda bizdiń ortalyqtan 35 myń zeınetker ótti. Biz bul ortalyqty birneshe adam birigip ashqan edik, al 2022 jyldyń 1 qańtarynan bastap memleket qarjylandyryp keledi. Zeınetkerlerge qyzmet kórsetý úshin biz qalanyń 4 aýdanynda ortalyq fılıaldaryn ashtyq. Onda kún saıyn 9 myń adam qyzmet alady. Bıylǵy shilde aıynda Astananyń besinshi aýdanynda taǵy bir fılıal ashylady. Bizdiń zeınetkerler ortalyqta jáne onyń fılıaldarynda 27 qyzmet túrin ala alady», - dedi M. Erketaev Astana kommýnıkatsııalar ortalyǵynda ótken brıfıngte.
Spıkerdiń aıtýynsha, 2019 jyly júrgizilgen sotsıologııalyq zertteý Astanada halqynyń 18%-y jalǵyzbasty adamdar ekenin kórsetken. Elordalyq zeınetkerlerdiń shamamen 20%-y kútimdi qajet etedi. Bul adamdardy áleýmettendirý, basqalarmen baılanys ornatyp, tezireý saýyǵýy úshin osyndaı ortalyq ashylǵan.
M. Erketaev jyl basynan beri 7 myńnan astam qart adam keletinin, olardyń kópshiligi emhanalarǵa barmaıtynyn, ortalyqta saýyqtyrý, áleýmettik jáne ekonomıkalyq qyzmetter alatynyn atap ótti. Kóbisi qarjylyq saýattylyqty úırenip jatyr.
Mekeme ashylǵanǵa deıin medıtsınalyq ýnıversıtetpen jáne qalalyq emhanalarmen memorandýmdar jasalǵan. Qazirgi ýaqytta 9 emhana ortalyqpen tyǵyz jumys isteıdi. Egde jastaǵy adamdar Altsgeımer, Parkınson, qant dıabeti, gıpertonııa, tirek-qımyl apparatynyń aýrýlarymen jıi aýyrady. Sondyqtan ortalyqtyń medıtsınalyq uıymdardan aıyrmashylyǵy – eń aldymen osy aýrýlardyń aldyn alýǵa nazar aýdarady. Zeınetkerlermen áleýmettik qyzmetker, psıholog jáne jalpy tájirıbelik dáriger jumys isteıdi. Olar ońaltý gımnastıkasymen, qarttarǵa arnalǵan fıtnespen, ıogamen, aıkýnemen, skandınavııalyq serýendeýmen, «tsıgýn» tynys alý gımnastıkasymen, bımen, ústel tennısimen aınalysady. Bul sabaqtar ortalyqqa baldaqpen kelgen zeınetkerlerge de kómektesedi jáne olar saýyǵyp ketedi.
Sondaı-aq, M.Erketaevtyń aıtýynsha, ortalyqta mádenı-buqaralyq is-sharalar, kontsertter, teatrlarǵa barý, elordanyń tarıhı oryndaryna ekskýrsııalar ótkiziledi. Oǵan qosa, qoldanbaly óner úıirmeleri jumys isteıdi jáne zeınetkerler óz jumystaryn jetim balalarǵa syıǵa tartady.
