Astanadaǵy Baýyrjan Momyshulynyń eskertkishine gúl shoqtary qoıyldy
Saltanatty sharaǵa áskerı salanyń ardagerlerimen birge «QazMZÝ» áskerı kafedrasynyń stýdentteri qatysty. Saptaǵy sarbazdardyń aldyna shyǵyp sóz sóılegen «Qarýly Kúshteriniń ardagerleri» respýblıkalyq qoǵamdyq birlestigi tóraǵasynyń orynbasary Marat Nuǵymanov jas býyn ókilderine batyr Baýyrjan Momyshulynyń erlikterinen syr shertti.
«Búgingi shara Qarýly Kúshterdiń qurylǵan kúni men Uly Jeńis kúni qurmetine ótkizilip otyr. Jeńistiń qalaı kelgenin keıingi urpaqqa túsindirý úshin búgin batyr babamyz -Baýyrjan Momyshulynyń eskertkishiniń aldyna jınalyp otyrmyz. Biz babalardyń eren erligin, tolaǵaı eńbegin árqashan esimizde saqtaýymyz kerek», - dedi ol.
Marat Nuǵymanov batyr babalar jastardyń jarqyn bolashaǵy úshin keýdesin oqqa tósep, búgingi beıbit kúndi artyna mura etip qaldyryp ketkenin atap ótti.
«Baýyrjan Momyshuly - tarıhta, áskerı pedagogıkada artyna mol mura qaldyrǵan batyr. Osy kisiniń ómiri bárimizge úlgi bolýy kerek. Baýyrjan Momyshuly komandır bolǵan dıvızııanyń ishinde kókshetaýlyq Málik Ǵabdýlın de bolǵan. Ol kisi meniń atam bolyp keledi. Eger jastar patrıot bolmasa, Ulttyq ıdeıany júzege asyrý múmkin bolmasy anyq. Sondyqtan, jastarymyzdy durystap tárbıelesek, sonda ǵana Máńgilik el bola alamyz», - dep túıdi Marat Nuǵymanov.
Aıta ketsek, Keńes odaǵynyń batyry, jazýshy, Ekinshi dúnıejúzilik soǵystyń dańqty jaýyngeri, áskerı qolbasshy, strateg jáne taktık Baýyrjan Momyshuly soǵysta general-maıor I.V. Panfılov basqarǵan áıgili dıvızııanyń quramynda 1941 jyldyń qyrkúıek aıynan bastap qatysqan.
Batalon komandıri retinde aǵa leıtenant Baýyrjan Momyshuly Máskeý úshin shaıqasta 207 ret urysqa aralasqan. Ol áldeneshe ordendermen, medal-darmen marapattaldy. Dúnıe salǵannan keıin oǵan Keńes Odaǵynyń Batyry (1990 jyly) ataǵy berildi.
