Astanadaǵy batýt oqıǵasy: Zardap shekken balalarǵa ońaltý sertıfıkaty berildi
ASTANA. QazAqparat - Astanada batýttan qulaǵan balalardyń ata-anasy dárigerlerge alǵys aıtty, dep habarlaıdy QazAqparat Astana qalalyq Densaýlyq saqtaý basqarmasyna silteme jasap.
Olar medıtsına salasyndaǵy birinshi Altyn shipager syılyǵyn tabystaý rásiminde sahnaǵa shyqty.
«Sizderdiń altyn qoldaryńyzdyń arqasynda barlyq bes bala aman qaldy. Sizderge ana retinde óz atymnan jáne otbasymnyń atynan úlken alǵys aıtamyn. Meniń eki balama der kezinde medıtsınalyq kómek kórsetildi, sizderdiń kómekterińizben balalarym ekinshi ret ómirge kelgendeı boldy», - dedi ata-analardyń biri.
Qala ákimi Áset Isekeshev te batýtta bolǵan keleńsiz oqıǵany eske aldy. Oqıǵa bolǵan kúni belgili neırohırýrg Serik Aqsholaqov bastaǵan bilikti mamandar bar jumysyn tastap, balalarǵa kelgen. Ákimdik atynan zardap shekken balalarǵa tegin ońaltý kýrsyna sertıfıkattar tabystaldy.
Eske sala ketsek, 4 mamyrda elordada «Jannur» saýda úıi aýmaǵyndaǵy batýtty qatty jel ushyryp, 5 bala zardap shekken bolatyn. Batýt kúrdeli konstrýktsııaly bolǵan, jalpy aýdany 200-250 sharshy metr.
QR ІІM Tótenshe jaǵdaılar komıteti ata-analardy óz balalarynyń taǵdyryna jaýapkershilikpen qaraýǵa shaqyrdy. Sebebi ata-analar aýa raıynyń qolaısyzdyǵyn kóre tura olardy batýtqa oınaýǵa jibergen.
Odan keıin belgili bolǵandaı «Jannurdaǵy» jaǵdaıdan soń elimizdegi barlyq attraktsıondar tekserildi.
Astana qalasynyń ákimi Áset Isekeshev zardap shekken balalardyń hal-jaǵdaıyn bilý maqsatynda qalalyq №2 balalar aýrýhanasyna baryp, kinálilerdiń jazaǵa tartylatyndyǵyn aıtqan bolatyn.
