Astanadaǵy barlarda túnde ishimdik satýǵa shekteý qoıylýy múmkin
NUR-SULTAN. QazAqparat – Nur-Sultan qalalyq Polıtsııa departamenti Jergilikti polıtsııa basqarmasynyń basshysy Ǵusman Jakın elordadaǵy barlarda saǵat 23.00-den keıin ishimdik satýdy shekteý bastamasy qandaı satyda turǵanyn aıtyp berdi, dep habarlaıdy QazAqparat tilshisi.
«Bul suraq birshama talqyǵa tústi. Rasynda da, mundaı bastamany kóterdik. Jumys búginnen bastalǵan joq, taldaý udaıy júrgizilip otyrady. Saıyp kelgende kóńil kóterýge arnalǵan oryndarda saǵat 00.00-den keıin ishimdik ishkender kóshege jáne qoǵamdyq oryndarǵa shyǵyp alyp, qylmys jasaıdy», - dedi ol Polıtsııa departamentinde ótken baspasóz máslıhatynda.
Basqarma basshysynyń aıtýyna qaraǵanda, tıisti bastama zańnamalyq negizde usynylyp otyr.
«Departament bastyǵy usynysty zańnamalyq negizde joldady. Mundaı suraqty polıtsııanyń ózdiginen sheshe almaıtyny belgili. Zańnamalyq negiz kerek. Osy usynyspen buryn ákimdikke de, Іshki ister mınıstrligine de shyqqanbyz», - dedi Ǵusman Jakın.
Onyń aıtýyna qaraǵanda, mereke jáne demalys kúnderi tártip buzýshylyqtar jıi tirkeletindikten, polıtsııa amalsyz atalmysh oryndarǵa polıtsııa jasaǵyn qoıatyn kórinedi. Sol sebepti, ishimdikti saǵat 23.00-den keıin satýǵa shekteý qoıý bastamasy áli kúshin joımaǵan. Dese de, basqarma basshysy osynaý qatań shara barlyq barlar men restorandarǵa, klýbtarǵa qatysty bolmaıtynyn aıtyp otyr.
«Biz tolyqtaı shekteý qoıý kerek demeımiz. Biraq, tártip buzýshylyq jıi bolatyn ári bilikti kúzet qyzmeti joq, dabyl ornatylmaǵan, beınebaqylaý kamerasy joq oryndarmen jeke jumys júrgizý kerek dep esepteımiz. Al «tynysh» oryndarda basqasha jumys júrgiziledi», - dedi ol.
Aıta ketsek, osy jyldyń sáýir aıynda Nur-Sultan qalalyq Polıtsııa departamentiniń Jergilikti polıtsııa basqarmasy elordanyń kóńil kóteretin oryndarynda saǵat 23.00-den keıin ishimdik satpaý bastamasyn kótergen bolatyn.
