Astanadaǵy "Áziret Sultan" meshiti alǵashqy qasıetti Qadir túnin ótkizdi
ASTANA. 15 tamyz. QazAqparat - Búgin Astana tórindegi «Áziret Sultan» meshitinde jamaǵat alǵash ret qasıetti Qadir túnin ótkizdi, dep habarlady Meshittiń baspasóz qyzmeti.
Jaratýshy Iemiz bul túnde jasalǵan qulshylyqty myń aıda jasalǵan ǵıbadattan artyq dep qabyldaǵan. Qadir túni - Paıǵambarymyz Muhammedtiń (s.a.ý.) úmmetinen basqa eshbir úmmetke berilmegen Allanyń syıy.
Ashylý saltanatyna Elbasynyń ózi qatysqan TMD-daǵy eń eńseli de sáýletti sanalatyn Elordamyzdyń «jaýharyna» aınalǵan «Áziret Sultan» meshitine Qadir túnin kútýge 10 myńnan astam adam jınaldy. Olardyń arasynda ıslamdy ómir salty sanaıtyn namazhan jamaǵat ta, dástúrli dinine moıyn burǵan jastar da, elimizdiń birqatar zııaly qaýym, buqaralyq aqparat quraldary ókilderi men memlekettik sheneýnikter de bar.
Jınalǵan qaýym - «Áziret Sultan» meshitiniń jamaǵaty myń aıdan da artyq bul túndi ǵıbrat pen ǵıbadatqa toly ótkizdi. Meshitte eń áýeli quptan jáne taraýyq namazdary oqyldy, nasıhat aıtyldy.
«Áziret Sultan» meshitiniń bas ımamy Qaırat Joldybaıuly jamaǵatty Qadir túnimen quttyqtaı kele: «Bizdiń ortaq Otanymyz Qazaqstannyń álem halyqtary qyzyǵa qaraıtyn eldiń tynyshtyǵy, halyqtyń birligi, dinı tózimdilik, ulttyń tutastyǵy sııaqty baılyǵyn Alla uzaǵynan súıindirsin» dedi.
«Bizdiń kúshimiz - birlikte» degen Elbasy sózin tilge tıek etip, halyqty osy yntymaq pen bereke jolynan taımaýǵa shaqyrǵan Bas ımam: «Aılardyń sultany, Alla Taǵalanyń meıirim shapaǵaty erekshe asyp-tasatyn Qasıetti Ramazan aıynda ustaǵan orazalaryńyz, tilegen tilekterińiz, jasaǵan minájattaryńyz, qulshylyq-ǵıbadattaryńyz, bergen sadaqalaryńyz qabyl bolsyn! Seksen úsh jylǵa para-par keletin myń aıdan da qaıyrly Qadir túni múbárák bolsyn. Alla osy túndi qulshylyqpen, ǵıbadatpen, minájatpen, Alla Taǵaladan Otanymyzǵa, ultymyzǵa, dinimizge, kúlli adamzatqa tynyshtyq ári jaqsylyq tileýmen ótkizýge jazsyn», - degen Qazaqstan musylmandary dinı basqarmasynyń bas Múftıi Ábsattar-qajy Derbisalynyń quttyqtaýyn jetkizdi.
Sondaı-aq, múbárak merekege oraı Qazaqstan Respýblıkasy Parlamenti Senatynyń depýtaty Ádil Ahmetov pen akademık Tólegen Qojamqulov jáne t.b. el zııalylary jamaǵat aldynda sóz alyp, ózderiniń lebizderin bildirip, qazaqstandyqtardy Qasıetti Qadir túnimen quttyqtady. Olar búkil qazaqstandyqtarǵa ıman, adal da mol, sarqylmas yrys-bereke, eki dúnıeniń baqytyn tiledi.
Budan keıin jamaǵatqa ýaǵyz-nasıhat aıtylyp, jamaǵatpen «tásbıh namazy» oqyldy. Jurtqa erkin qulshylyq qylý úshin de ýaqyt berildi. Qadir túniniń sońyna qaraı Quran oqylyp, bata jasaldy.
