Astanadaǵy aıqastaryna daıyndalyp jatqan boksshylar ashyq jattyǵý ótkizbek

ASTANA. QazAqparat - EKSPO halyqaralyq kórmesi aıasynda uıymdastyrylatyn boks keshinde judyryqtasatyn Qanat Islam men ózge de birqatar boksshylar qazir Astanada jabyq jattyǵýlar ótkizip  jatyr. Bul týraly ol QazAqparat tilshisine bergen suhbatynda málim etti.

«Qazir Astanadaǵy «Astana Arena» stadıonynda jabyq jattyǵý jasap jatyrmyz. Janymda 9 qyrkúıek kúni menimen birge el atynan sharshy alańǵa shyǵatyn birqatar boksshy bar. Jattyǵýymyz oıdaǵydaı ótýde. Sparıng qarsylastarymyz da jetkilikti. Bapkerlerimizdiń nusqaýy boıynsha barlyq josparymyz birtindep iske asýda», - dep atap ótti Qanat Islam.

Sondaı-aq ol ashyq jattyǵýyn qashan ótkizetinin aıtyp berdi.

«Bizdiń jattyǵyp jatqan zalymyzǵa kelip, boks keshine daıyndyǵymyzdy tamashalaǵysy keletin jankúıerlerimiz óte kóp. Olardyń barlyǵy zalda júrse jattyǵýǵa keri áserin tıgizetin sátter bolady. Sondyqtan mańyzdy aıqasqa daıyndalyp jatqandyqtan jabyq esik aıasynda jattyǵýdy jón sanadyq. Jankúıerlerimiz túsinistikpen qaraıdy degen senimdemiz. Ashyq jattyǵý jasaıtyn kúnderimiz de alys emes. Buıyrsa tamyzdyń ekinshi jartysynda jankúıerler ashyq jattyǵýymyzdy tamashalaı alatyn bolady», - dedi Islam.

Eske salaıyq, 9 qyrkúıek kúni Astanadaǵy «Saryarqa» velotreginde boks keshi ótip, onda Qanat Islam (24-0,19 KO) kanadalyq Brendon Kýkpen (18-0, 11KO) judyryqtasady. Boksshylar birinshi orta salmaqtaǵy IBF tıtýlyna úmitkerlikke talasady. Osy jekpe-jektiń anderkartynda qazaqstandyq 8 boksshy óner kórsetedi. Olar - Janqosh Turarov (21-0, 15KO), Jánibek Álimhanuly (1-0, 1KO), Meıirim Nursultanov (3-0,2KO), Rýslan Myrsataev (3-0, 3KO), Álı Ahmedov (7-0,5KO), Aıdos Erbosynuly (6-0, 6KO), Dımash Nııazov (11-0-3, 5KO) jáne Nursultan Jańabaev.