Astanadaǵy avtobýs kartasyna aqsha nege birden túspeıdi
ASTANA. QazAqparat - Búginde áleýmettik jelilerde elektrondy kartaǵa aqshanyń ýaqytynda túspeıtinine qatysty aryz-shaǵymdar kóptep aıtylýda. Bir táýlik emes, tipti eki-úsh kúnge deıin balans túspeı jatady. «Astana LRT» atalǵan máselege qatysty túsinik berdi, dep habarlaıdy QazAqparat tilshisi.
Kompanııanyń qoǵammen baılanys jónindegi departament dırektory Naýat Azanbaevanyń aıtýynsha, bank pen QIWI termınaldary arqyly salynǵan aqsha birden túsedi. Sebebi barlyq kartalar offlaın rejimde jumys isteıdi. Oǵan uıaly baılanys, ıa bolmasa ǵalamtor jelisi kerek emes. Aqsha tólengen boıda esep-shotqa túsedi. Ondaı aýdarymdarǵa ǵalamtordyń bar-joǵy áser etpeıdi.
«Másele mynada, aqsha salǵannan keıin elektrondy kartany mindetti túrde aktıvızatsııalaý qajet. Ol úshin daladaǵy termınalǵa qoıyp, 4-5 sekýnd ustaı turýǵa bolady. Sonda «karta aktıvırovana» degen jazý shyǵady. Budan bólek, avtobýs valıdatoryna qoıyp, 10 sekýndtaı ustap tursańyz da bolady. «Popolnenıe. Ok!» degen jazý shyqsa, karta iske qosyldy degen sóz. Osylaısha, aqsha salǵan saıyn kartany únemi aktıvızatsııalap otyrý qajet. Mysaly, meniń joldasym Kaspi arqyly keshki ýaqytta aqsha saldy da, tańerteń esh qıyndyqsyz avtobýspen jumysqa bardy. Sonda ol kartany kóbirek ustap turdy da, «Popolnenıe. Ok!» degendi kútti. Al keıbir jolaýshylar avtobýsqa kirgennen keıin kartany jaı tıgize saldy. Sosyn qyzyl shamnyń janǵanyn kórip, aqsha túspedi dep oılady. Joq, olaı emes. Kartany 10 sekýndtaı ustap, aktıvızatsııalaý qajet», - dedi N.Azanbaeva QazAqparat tilshisine bergen suhbatynda.
Aıta keteıik, Astanadaǵy qoǵamdyq kólikte saralanǵan tarıfter engizilgeli beri kartamen júretin jolaýshylar úshin jolaqy burynǵy kúıinshe qaldy. Al qolma-qol aqsha beretinder 180 teńge tóleıdi. Biraq avtobýsta elektrondy kartany satyp alýǵa bolady. Іshinde balans bolmasa da, baratyn jerge tegin jetip alýǵa múmkindik beriledi. Keıbir kondýktorlar ony aıtpaıdy, kartany satsa da, ústinen jol júrý aqysy - 180 teńgeni de alyp qoıady.
Jyl basynan beri qoǵamdyq kólikte jolaqy tóleýden bas tartqan 359 adam anyqtaldy. Olarǵa salynǵan aıyppuldyń kólemi - 1 726 790 teńgeni qurady. Budan bólek, atalǵan tártip buzýshylyqtarǵa jol bergen 130 kondýktor 1 563 250 teńgeniń aıyppulyn tóleıtin boldy.
