Astanadaǵy aýrýhanada shala týǵan nárestelerge arnalǵan Katamnez bólimshesi ashyldy
ASTANA. QazAqparat - Elordadaǵy EKSPO ǵımaratyna irgeles №2 kópbeıindi qalalyq aýrýhanada shala týǵan balalardy kútip, emdeýge arnalǵan Katamnez bólimshesi ashyldy, dep habarlaıdy QazAqparat tilshisi.
«Eger bala on eki múshesi saý bolyp týsa, pedıatorlardyń tekserýimen náreste qalypty jaǵdaıda jetile beredi. Al eger náreste shala týsa, ıaǵnı máselen 40-shy aptada, 28-shi, 30, 35 nemese 36-shy aptada týatyn bolsa, onda oǵan erekshe em men kútim kerek. Merziminen buryn, salmaǵy az bolyp týǵan balalar ártúrli patologııamen ómirge keledi. Al keıbir balalar dúnıe esigin saý qalypta ashsa da, onyń nevrologııalyq nemese artopedııalyq patologııasy bolýy yqtımal. Sal aýrýymen týatyn balalardyń bolatynyn bilesiz. Ondaı sanattaǵy balalardy anasymen birge aýrýhanalar alǵysy kelmeıdi. Sebebi, 1 jasqa deıingi balany balalar aýrýhanasy qabyldamaıdy. Shala týǵan balalardyń analary osyndaı máselege tap bolady», - deıdi №2 kópbeıindi qalalyq aýrýhananyń bas dárigeri Ivan Lı.
Onyń aıtýynsha, shala týǵan balalardyń medıtsına tilinde «katamnesi» bar náresteler dep ataıdy. Katamnes sózi - erekshe kútimdi talap etetin balalar.
Ivan Lıdiń aıtýynsha, mundaı sanatta Astanada jyl saıyn 1500 bala ómirge keledi eken.
«Mine, osy sebepti №2 kópbeıindi qalalyq aýrýhananyń akýsherlik blogy atalmysh máseleni tereń zertteı otyryp, reabılıtologtardyń arnaıy ádistemesi boıynsha pedıatorlardy daıarlap, bul másele basqa elderde qalaı sheshilip jatqanyn zerdeledi. Ásirese, bul sharýa kórshiles Reseıde birshama jolǵa qoıylǵan. Máskeý men Sankt-Peterbýrg qalasyndaǵy mamandandyrylǵan ortalyqtar barshylyq. Biz óz mamandarymyzdy ótken jyly sol qalalarǵa joldap, qyzmetkerlerimiz belgili bir daıarlyqtan ótkennen keıin shala týǵan balalardy emdeýge arnalǵan tolyqqandy bólimshe ashtyq», - deıdi Ivan Lı.
№2 kópbeıindi qalalyq aýrýhananyń bas dárigeri atalmysh bólimshede shala týǵan balalardy tegin emdep, olardyń anasyn oqytatyn bolady.
«Osy bólimshe - Katamnes bólimshesi dep atalady. Ol biregeı. Sebebi, elimizdiń basqa jerinde mundaı statsıonarlyq bólimshe joq. Josparymyz barshylyq. Rebıltologtardyń negizgi shoǵyry jastardan turady», - deıdi ol.
Bólim bir jylda shamamen 260 balany kútim-emdeýge qaýqarly. Jańa bólimshede nárestelerdi voıta-terapııa, bobat-terapııa, apparatty fızıoterapııa, LFK jáne ártúrli massaj túrlerimen emdeıtin bolady.
