Astanadaǵy áýejaı týraly ne bilemiz

Astana qalasynyń áýejaıy 1931 jyly kishigirim ushaqtarǵa qyzmet kórsetý úshin ashylǵan. Búginde 86 jyl ótkennen keıin, áýejaı Eýrazııadaǵy eń zamanaýı áýejaılardyń birine aınaldy. Onda táýlik boıy alys jáne jaqyn shetel aımaqtaryna ushatyn 80 shaqty ushaqqa qyzmet kórsetiledi.

1948 jyldan bastap aýyr ushaqtardy qabyldaı bastaǵan áýejaı 1956 jyly táýlik boıy jumys rejımine kóshti. Mekeme derekterine sáıkes, 2016 jyly áýejaıdan 3 mıllıon 419 myń 484 jolaýshy ushqan jáne 49 myń 365 reıs oryndalǵan.

Astana áýejaıynan Qazaqstan Respýblıkasynyń barlyq oblys ortalyqtaryna, sondaı-aq TMD elderiniń Máskeý, Tashkent, Omby, Sankt - Peterbýrg, Krasnoıarsk, Kıev, Mınsk, Ekaterınbýrg, Baký, Novosibir qalalaryna turaqty reıster ushady. Sondaı-aq alys shetel qalalary: Frankfýrt, Vena, Ábý-Dabı, Ystanbul, Beıjiń, Antalııa, Úrimshi, Shardja, London, Bangkok qalalaryna deıin reıster ushady. Sondaı-aq áýejaı «Eır Astana», «SKAT», «Jetisý», «Bek Eır», «Transaero», «Lıýftganza», «Etıhad Eırýeıs», «Avstrııa avıajelileri», «Týrkısh Eırlaınz», «Aerosvıt», «Ýzbekıston Havo Iýlları», «Belavıa», «Ýkraına halyqaralyq avıajelileri», «Chaına Saýzen Eırlaınz», «Eır Arabııa», «Reseı»  jáne ózge de alys jáne jaqyn shetelderdiń 15 avıakompanııasynyń turaqty reısterine qyzmet kórsetedi. Jyl saıyn Astana áýejaıynda kem degende eki-úsh avıakompanııa jańa reıs ashady. Bıyl EKSPO-2017 halyqaralyq kórmesine oraı, Astanadan Beıjiń, Helsınkı, Erevan, Varshava, Frankfýrt qalalaryna tikeleı áýe reısteri ashyldy. 

Búginde Astana áýejaıy áýe kemelerdiń barlyq túrlerin shekteýsiz qabyldaı alady. Astanalyq áýejaıdy damytý jumystary IATA (Áýe qatynasynyń halyqaralyq qaýymdastyǵy) jáne IKAO (Azamattyq avıatsııanyń halyqaralyq uıymy) halyqaralyq standarttaryna sáıkes júrgiziledi. Áýejaı Ground Handling Council IATA halyqaralyq uıymynyń quramyna engen jáne azamattyq avıatsııa halyqaralyq uıymynyń (IKAO) ІІІA sanaty boıynsha sertıfıkattalǵan.

Astana áýejaıy óz jolaýshylaryna eń qolaıly qyzmetterdi usynady: SIP jáne VIP zaldary, ana men bala bólmesi, dinı ádet-ǵuryptar bólmesi, júk saqtaý kamerasy, ushý zalynda ornalasqan shylym shegý bólmesi bar. Reısti kútý kezinde jolaýshylarǵa meıramhana, bar, kafe qyzmetkerleri qyzmet kórsetedi. Sondaı-aq aerobeket kesheninde pochta qyzmetin, birneshe bankter bankomattarynyń qyzmetin, valıýta aıyrbastaý pýnktiniń qyzmetin paıdalanýǵa bolady. Avıabıletterdi aerobekettiń ekinshi qabatyndaǵy kassalardan satyp alýǵa, ózińizge nemese dostaryńyzǵa syılyq alǵyńyz kelse kádesyı dúkeninen syılyqtardyń túr- túrlerin satyp alýǵa bolady. Jolaýshylardyń jeke avtokóligine arnalǵan kólik turaǵy qarastyrylǵan.

Atap ótken jón, 2017 jyldyń 31 mamyrynda Memleket basshysy Nursultan Nazarbaev Astana áýejaıynyń jalpy aýdany 47 myń sharshy metr bolatyn jańa termınalyn ashty. Budan bylaı, eski ǵımarattan ishki reıster ushyrylyp, jańa termınal xalyqaralyq reısterge qyzmet kórsetetin bolady. Jańa termınal jylyna 5 mln jolaýshyny qabyldaıdy. Eski ǵımaratpen birge atalǵan kórsetkishti 8,2 mln jolaýshyǵa deıin jetkizýge múmkindik bar. Jańa termınalda tórt kireberis bar. Іshinde jolaýshylardy tirkeıtin 26 birdeı oryn jáne tólqujat tekseretin 42 kabına ornatylǵan. Jańa júıeniń arqasynda qol júkterdiń 1 200 danasyn bir saǵattyń ishinde ótkizýge bolady. Júkterdi ótkizý júıesiniń basty ereksheligi sol, qandaı da bir qaýipti júkter bolsa, onyń barlyǵy avtomatty túrde birden basqa jolaqpen ketedi de, qaýipsiz aımaqqa shyǵarylady. Ekinshi qabatta tolyǵymen dámxanalar men meıramxanalar bolady.

Aıta keteıik, Qazaqstan Respýblıkasy Úkimetiniń  2017 jylǵy 20 maýsymdaǵy № 381  qaýlysyna sáıkes Astana halyqaralyq áýejaıyna QR Prezıdenti Nursultan Nazarbaevtyń esimi berildi.