Astanadaǵy «Atameken» alańynda jas jubaılar nekesi qıyldy
ASTANA. Shildeniń 2-si. QazAqparat /Marlan Jıembaı/ - Búgin «Atameken» alańynda 35 juptyń nekesi saltanatty túrde qıylyp, elordalyq otbasylardyń sany 35 adamǵa tolyǵa tústi.
Astana kúni merekesine arnalǵan neke qııý saltanatty rásimine 4 avtobýspen jetken jas jubaılar bir-bir búldirshindi jetektep, «Atameken» alańyndaǵy arnaıy ázirlengen alańǵa jınaldy. Osy jerde olardy zańdy nekege otyrýlarymen quttyqtaǵan AHAJ mamandary memlekettik neke qııý kýálikterin tapsyrýdy búldirshinderge berdi.
Osydan keıin sóz alǵan Astana qalalyq ádilet departamentiniń bastyǵy Erbolat Balǵabaev, «sizderdi kele jatqan Astana kúnimen jáne osy mereke qarsańynda jınalǵan jas jubaılardy saltanatty neke qııý kúnimen shyn júrekten quttyqtaımyn. Halqymyzda «Otan otbasynan bastalady» degen sóz bar. Sizder búgin memlekettiń kishi úlgisi - otbasyn quryp, otaýyn tiktińizder. Qurylǵan jas otaýlaryńyz Otanymyz Qazaqstan sekildi baı-qýatty, ishi tatý, syrty qaýipsiz, ómiri beıbit, baqytty bolýlaryna shyn júrekten tilektespin. Úılený tek neke qııý ǵana emes, ol mańyzdy áleýmettik oqıǵa, ol - eki jastyq bir-birine taǵdyryn senip tapsyrýy. Sizderdiń sezimderińiz máńgilik jas, júrekterińiz egiz, tilekterińiz bir, juptaryńyz jazylmasyn», dedi.
Shara sońynda «Dýman» saýda oıyn-saýyq ortalyǵynda jas jubaılarǵa shashý shashylyp, arnaıy tort kesý saltanaty ótti.
Osydan eki jyl buryn Astana turǵyndarynyń otansúıgishtigin arttyrý, olardyń boıyna óz qalasyna degen súıispenshilikti darytý ári shańyraq kótergen kúnderin umytylmas oqıǵaǵa aınaldyrý maqsatynda uıymdastyrylǵan bul neke qııý rásimi elorda merekesiniń qyzyqty jobalarynyń birine aınalyp otyr.
