Astanadaǵy «Astana-Arena» stadıonynda 7-Qysqy Azııa oıyndarynyń saltanatty ashylý rásimi aıaqtaldy

Eki jarym saǵattan astam ýaqytqa sozylǵan teatrlandyrylǵan úlken shoý qoıylym - basynan aıaǵyna deıin qazaq halqynyń saq dáýirinen bastaý alatyn yqylym zamanǵy tarıhynan syr shertti. Saltanatty shara tuǵyrǵa ornatylǵan Qazaqstannyń kók baıraǵynyń bıikke kóterilýinen jáne el ánuranynyń oryndalýymen bastaldy. Odan keıin Qazaq elinde týyn jelbiretken 7-Qysqy Azııa oıyndarynda baq synaıtyn 27 Azııa memleketiniń sportshylarynyń sherýi ótti. Kórsetilgen árbir teatrlandyrylǵan mýzykalyq qoıylymnyń ózindik jeke maǵynasy boldy. Máselen, Nurjamal Úsenbaevanyń ániniń súıemeldeýimen bastalǵan kórsetilim kezinde kúnniń ystyq shýaǵy men nurynyń astynda dúnıege kelgen sábı, ananyń jyly júregi men yqylasyna bólenip ósip, júregine uıalaǵan mahabbatpen Jer-Anany sýsyndatady. Óz kezeginde tabıǵat oǵan sondaı qaıtarymmen jaýap beredi.

Stadıonnyń tóbesinde kóktep ushqan qanatty tulparlar men qyran qustar - qazaqtyń salt-dástúrleri, turmysy men ómiri, mańdaıyna bitken bı-jyraýlary men batyrlary týraly kórsetilgen beıne kórsetilimderdi odan saıyn áserli ete tústi.

Jaýyngerlerdiń bı kompozıtsııasy barysynda bıikten túsken altyn adamnyń músini men kóptegen ult ókilderin óziniń beıbit aspanynyń astyna shoǵyrlandyrǵan qazaqtyń qara shańyraǵyn kórermender erekshe yqylaspen qarsy aldy.

Shara sońynda sahna tórine shyǵarylǵan Azııa olımpıada keńesiniń jalaýy bıikte jelbiregen Qazaqstan Týynyń janynan boı túzep, AOK-niń ánurany oryndaldy.

Astana qalasynyń ákimi Imanǵalı Tasmaǵambetov pen Azııa olımpıadalyq keńesiniń prezıdenti sheıh Ahmad ál-Fahad ál-Sabahtyń júrekjardy tilekterinen keıin Qazaqstan Prezıdenti Nursultan Nazarbaev qazaq jerindegi Aq Azııada qatysýshylaryna lebizin bildirip, Oıyndardy saltanatty túrde ashyq dep jarııalady.

Budan keıin el namysyn halyqaralyq deńgeıde qorǵaǵan qazaqstandyq sportshylar 7-Qysqy Azııa oıyndarynyń bas alaýyn tutatty.