Astanadaǵy áskerı sherýde áýe kúshteriniń 70-ten astam avıatsııa tehnıkasy ushady
Avıatsııa tehnıkasyn kóshirý Áýe qorǵanysy kúshteriniń bas qolbasshysy avıatsııa general-maıory N.Ormanbetovtiń basshylyǵymen júzege asyryldy. Munda ushý quramy jattyǵý ushýlarynyń elementterin pysyqtaıtyn bolady. Kásibı sheberlik, tártip pen birlese jumys isteı bilý máselelerine aıryqsha nazar aýdarylady.
«Qazirgi ýaqytta biz jup bolyp jáne top quramynda ushýdy pysyqtaý ústindemiz. Bizdiń ushqyshtar joǵary deńgeıde daıarlanǵan, olar óz sheberlikterin udaıy jetildirip, shyńdap otyrady. Olar memlekettik mańyzy bar mindetti úzdik atqaryp shyǵady dep sanaımyn», - deıdi avıatsııa general-maıory N.Ormanbetov. Sherýlik saptyń jalpy ushý retimen maıdan, armııa avıatsııasynyń jáne áskerı-kóliktik avıatsııanyń toptary ótedi. Astanada «Qazaq eli» alańynyń ústimen Qazaqstan Áskerı áýe kúshteriniń 70-ten astam avıatsııalyq tehnıka birligi ushady dep kútilýde.