Astanadaǵy árbir tórtinshi jol-kólik oqıǵasynan balalar zardap shegedi
ASTANA. 31 shilde. QazAqparat - Jol-kólik oqıǵalarynan zardap shegýdiń aldyn alý elordalyq Jol polıtsııasy basqarmasynyń kúndelikti jumysynyń ajyramas bóligi bolyp tabylady.
Bul týraly astana.kz saıtynan habarlandy.
«Jazda jol-kólik oqıǵalarynyń sany ulǵaıa túsedi. Búgingi tańda Astanada 324 jol-kólik oqıǵasy tirkeldi, onda 36 adam qaza taýyp, 346-sy jaraqat aldy. Jol apattaryna negizinen jaıaý júrginshiler ótkelinen (67 fakti) jáne qıylystardan ótý (58 fakti) erejelerin buzý, kólik jyldamdyǵyn shamadan tys arttyrý (36) sebep bolýda. Al árbir tórtinshi apatta balalar zardap shegedi. Jalpy, jol - kólik oqıǵalarynyń 50% júrgizýshilerdiń kinásinen oryn alady», - delingen aqparatta.
Astana qalasynyń Jol polıtsııasy basqarmasy kólik quraldarynyń ıelerinen jaıaý júrginshiler ótkelinen ótkende asa muqııat bolýlaryn suraıdy. «Jaıaý júrginshiler ótkeliniń ar jaǵynda kólikter keptelip qalsa, jaıaý júrginshiler jolynda turmańyz. Eger jaıaý júrginshiler ótkeliniń aldynda kólik toqtap tursa, onda onyń aldynan ótip bara jatqan adamnyń joq ekenine kóz jetkizgende ǵana ary qaraı júrińiz. Kólik jyldamdyǵyn tańdaǵan kezde qozǵalystyń qarqynyn, belgilengen shekteýlerdi, erekshelikterdi jáne kólik quralynyń jaǵdaıyn, jol men meteorologııalyq jaǵdaılardy eskerý kerek. Jyldamdyq kólik qozǵalysyn udaıy baqylaýda ustaýǵa múmkindik berýge tıis» delingen baspasóz baıanynda.
