Astanadaǵy apatty úı turǵyndary 5-6 jylda túgel kóshiriledi – Jeńis Qasymbek

ASTANA. QazAqparat – Astananyń bıýdjetin ulǵaıtý birinshi kezektegi mindetterdi sheshý úshin júrgizilip jatyr. Bul týraly VIII shaqyrylǵan astana máslıhatynyń kezekten tys sessııasynda elorda ákimi Jeńis Qasymbek habarlady.

Búgin qalalyq máslıhatta Astana qalasynyń 2023-2025 jyldarǵa bıýdjetin naqtylaý máseleleri boıynsha kezekten tys sessııa ótti.

«Sizderden osy bıýdjetti jedel qabyldaýdy suraýǵa májbúrmiz. Saılaý kezeńi eki apta buryn aıaqtaldy, biraq qalanyń qajettilikterin keıinge qaldyrýǵa bolmaıdy. Sondyqtan biz usynatyn nusqany qoldaýyńyzdy suraımyz. Muny komıssııamen, máslıhat basshysymen (Erlan Qanalımov – red.), bıýdjettik komıssııa basshysymen talqyladyq, qosymsha qarastyrǵan suraqtar bar. Bul ásirese aýlalardy jóndeýge qatysty, pandýstar týraly aıttyq. Prezıdenttiń arnaıy tapsyrmalary bar, jyl basynda ol qalany abattandyrý men kógaldandyrýdy tapsyrdy. Biz bıyl kógaldandyrýǵa arnalǵan bıýdjetti 2 ese arttyryp jatyrmyz. Ótken jyly abattandyrý men kógaldandyrýǵa 17 mıllıard teńge bólinse, bıyl shamamen 32-33 mıllıard teńge bolady», – dedi Astana ákimi Jeńis Qasymbek.

Onyń aıtýynsha, bıyl qalada jarty mıllıon aǵash egý josparlanýda. Bıznes te elordany abattandyrýǵa belsendi qatysady dep kútilýde.

«Engizilgen túzetýlerge sáıkes, elordanyń 2023 jylǵa arnalǵan bıýdjeti 71,5 mıllıard teńgege – jergilikti kirister esebinen 640 mıllıardqa deıin ósedi. Jyl basynda Memleket basshysy keńes ótkizdi, elordaǵa respýblıkalyq bıýdjetten 235 mıllıard 700 mıllıon teńge bólindi. Bul qarajat birinshi kezektegi qajettilikterge jumsalady. Bıyl gaz-jylý stantsııalary, JEO-3-tiń birinshi kezeńi boıynsha másele tolyq sheshiledi, qalany sýmen jabdyqtaý, onyń ishinde Astanadan tys jerlerde jańa sý kózderin ıgerý máseleleri qolǵa alynbaq», - dedi ákim.

Sondaı-aq, Astana ákimi alıýkobond pen keramogranıtten jasalǵan qasbetterdiń qaptamasyn aýystyrý jumystary bastalatynyn aıtty.

Bıyl mundaı jumystar «Sem bochek» turǵyn úı kesheninde júrgiziledi. Bul rette shyǵyndardy «Azııa-Park» saýda ortalyǵymen ekige bólý josparlanýda. Jalpy, ákimdik máslıhatqa sáýir aıynyń sońyna deıin jańartý baǵdarlamasyn ázirlep usynady. Joba retinde 2030 jylǵa deıin apatty jaǵdaıdaǵy 4,5 myńǵa jýyq páterdi buzý kózdelip otyr. Bıyl osyndaı úı turǵyndaryna 300-400 páter beriledi. Aldaǵy ýaqytta jyl saıyn 700-ge jýyq páter beriledi. Jalpy, elordada 206 apatty úı turǵyndaryn 5-6 jyl ishinde qonystandyrý mindeti tur», - dedi Jeńis Qasymbek.

Talqylaýdan keıin depýtattar elorda bıýdjetine ákimdik usynǵan túzetýlerdi maquldady.