Astanadaǵy áleýmettik jáne óndiristik nysandardaǵy qurylys qarqyny jaman emes - Úkimet basshysy
ASTANA. 13 qazan. QazAqparat - Astanadaǵy áleýmettik jáne óndiristik nysandardaǵy qurylys qarqyny jaman emes.
Bul týraly búgin Astana ákimdiginde ótken qalany damytý jónindegi keńeste Premer-Mınıstr Serik Ahmetov málim etti.
«Búgin biz Astananyń birqatar áleýmettik jáne óndiristik qurylys nysandaryn aralap shyqtyq. Qurylys qarqyny jaman emes. Ózderińizge málim elordanyń damýy aıasyndaǵy árbir ǵımarattyń qurylys sapasy Memleket basshysynyń erekshe nazarynda. Osy aǵymdaǵy jyldyń 11 sáýirinde Elbasy Astananyń damýy boıynsha keńes ótkizip, Úkimetke jáne qala ákimdigine naqty tapsyrmalar berdi»,-dep atap ótti. S. Ahmetov.
Atap aıtqanda, búgin Úkimet basshysy men elorda ákimi Imanǵalı Tasmaǵambetov Klassıkalyq opera jáne balet teatrynyń qurylys nysanynda boldy. Bul nysandaǵy qurylys jumystary 2010 jyly naýryzda bastalǵan edi. Turan dańǵylynyń boıyndaǵy osy jańa ǵımarattyń aýmaǵy 8,51 gektardy qamtyp jatyr. Onda 1250 adamǵa arnalǵan kórermen zaly men 250 oryndyq kameralyq mýzyka zaly ornalasady. Teatrǵa kelgen kórermender úshin 326 oryndyq jerústi avtoturaǵy men 92 oryndyq jerasty parkıngi jobada qarastyrylǵan.
Budan bólek, S. Ahmetov Fotoelektr modýlderin qurastyrý zaýytynyń qurylysy barysymen tanysty. Zaýyttyń jalpy aýdany 10,6 sharshy metrlik úsh qabatty ǵımaratta ornalasqan. Іske qosylǵan soń ol jylyna 217 myń fotoelektr modýlderin óndirip, onyń qýattylyǵy 50 MVt bolady dep kútilýde. Belgili bolǵandaı, ony 100 MVt-ǵa deıin jetkizý múmkindigi bar kórinedi. Nysan 2012 jyldyń jeltoqsanynda paıdalanýǵa berilmek. Jobanyń maqsaty - elimizde kún energetıka tehnologııasyn damytý jáne qalpyna keltiriletin energııa kózderin shyǵarý boıynsha óndiris jolyn qurý.
Sonymen qatar, Úkimet basshy men qala ákimi «Myńjyldyq» alleıasynda boldy. Joba aıasynda ıgeriletin aýmaqtyń 805 gektarynyń 441 gektary ınvestorlarǵa, 363 gektary memleketke beriledi. Jobany júzege asyrý úshin 119,9 mıllıard teńge memlekettik ınvestıtsııa bólý qajettilik etedi. Al qurylys jáne osy baǵyttaǵy jumystarǵa jeke ınvestıtsııalar kólemi 939 mıllard teńgeni qamtymaq. Joba boıynsha 105,8 myń adamǵa arnalǵan 3,5 mln. sharshy metr turǵyn úı nemese 32 myń páter salý qarastyrylǵan.
